IPL 15 - 2022 IPL போட்டியில் இருந்து விலகிய பிரபல இங்கிலாந்து வீரர்!

ஐபிஎல் 2022 போட்டியில் இருந்து விலகுவதாகப் பிரபல இங்கிலாந்து வீரர் அலெக்ஸ் ஹேல்ஸ் அறிவித்துள்ளார். இதை அடுத்து ஆஸி. தலைவர் ஆரோன் ஃபிஞ்சை கொல்கத்தா அணி தேர்வு செய்துள்ளது.

ஐபிஎல் ஏலத்தில் ரூ. 1.50 கோடிக்கு அலெக்ஸ் ஹேல்ஸைத் தேர்வு செய்தது கொல்கத்தா நைட்ரைடர்ஸ் அணி. இந்நிலையில் கொரோனா தடுப்பு வளையத்தில் நீண்ட நாள் இருக்க முடியாததால் ஐபிஎல் 2022 போட்டியில் இருந்து விலகுவதாக ஹேல்ஸ் அறிவித்துள்ளார்.

கடந்த நான்கு மாதங்களாக கொரோனா தடுப்பு வளையத்தில் இருந்தேன். பிறகு கொரோனாவால் பாதிக்கப்பட்டேன். இதனால் இன்னொரு தடுப்பு வளையத்துக்குள் இருப்பது சாத்தியமில்லை. இதன் காரணமாக நான் சரியாக விளையாடாமல் போனால் அது அணிக்குப் பாதிப்பை ஏற்படுத்தும் என்றும் அவர் தன்னுடைய முடிவுக்கு விளக்கம் அளித்துள்ளார்.

2015 இல் மும்பைக்குத் தேர்வான ஹேல்ஸ் ஓர் ஆட்டத்திலும் விளையாடவில்லை. 2018 இல் சன்ரைசர்ஸ் அணிக்காக 6 ஆட்டங்களில் விளையாடினார்.

இதை அடுத்து ஹேல்ஸுக்குப் பதிலாக ஏலத்தில் யாரும் தேர்வு செய்யாத ஆஸி. தலைவர் ஆரோன் ஃபிஞ்சை கொல்கத்தா அணி தேர்வு செய்துள்ளது. கடந்த வருடம் நடைபெற்ற டி20 உலகக் கிண்ண போட்டியில் ஃபிஞ்ச் தலைமையில் அவுஸ்திரேலிய அணி உலகக் கிண்ணத்தை வென்றது.