சுற்றுலா ஆலோசனையில் எவ்வித மாற்றமும் செய்யப்படவில்லை - ஜூலி சாங்!

சில காலங்களுக்கு முன்னர் இலங்கைக்கு அறிமுகப்படுத்தப்பட்ட சுற்றுலா ஆலோசனையில் எவ்வித மாற்றமும் செய்யப்படவில்லை என இலங்கைக்கான அமெரிக்கத் தூதுவர் திருமதி ஜூலி சாங் தெரிவித்துள்ளார். 

 கொழும்பில் உள்ள அமெரிக்க மையத்தில் இடம்பெற்ற நிகழ்வொன்றின் பின்னர் உரையாற்றிய அவர், இலங்கைக்கு பயணத்தடை விதிக்கப்பட்டதாக கூறுவது போலியான செய்தி என தெரிவித்தார்.

இதன்போது மேலும் கருத்து வெளியிட்டுள்ள அவர், "அமெரிக்க தூதரகம் பாதுகாப்பு அச்சுறுத்தல் பற்றி அறிந்தால், அந்த தகவலை எங்கள் ஊழியர்கள், அமெரிக்க குடிமக்கள் மற்றும் சம்பந்தப்பட்ட அரசாங்கத்திற்கு தெரிவிக்க வேண்டும்.

 இந்த விஷயத்தில் நாங்கள் இரட்டைக் கொள்கையை பின்பற்றவில்லை. இது உலகம் முழுவதும் நாங்கள் பயன்படுத்தும் ஏற்றுக்கொள்ளப்பட்ட முறையாகும். 

அறுகம்பே பகுதிக்கு அச்சுறுத்தல் இருப்பது குறித்து நாங்கள் அறிந்த பின்னர், நாங்கள் இலங்கை அதிகாரிகளுக்கு அறிவித்தோம், அவர்கள் விரைவாக பதிலளித்தனர். 

நாங்கள் அவர்களுடன் தீவிரமாக பணியாற்றி வருகிறோம். அவர்களுடன் தினமும் கருத்துக்களைப் பரிமாறிக் கொள்கிறோம். இலங்கைத் தலைமை மற்றும் பாதுகாப்பு அதிகாரிகளுடனான ஒத்துழைப்பை நாங்கள் பாராட்டுகிறோம். 

வெளிப்படைத்தன்மைக்கான அவர்களின் அர்ப்பணிப்பு சிறப்பு வாய்ந்தது. தவறான தகவலைத் தெரிவிக்க விரும்புகிறேன். பயணத் தடை இல்லை. இலங்கைக்கு வழங்கப்பட்டுள்ள பயண அறிவுரைகள் இத்தாலி மற்றும் பிரான்ஸுக்கு வழங்கப்பட்டுள்ள அதே நிலையிலேயே உள்ளன” எனத் தெரிவித்துள்ளார்.