உலக அரங்கில் ஒரு மகத்தான பொருளாதார நிபுணராக அறியப்படும் மன்மோகன் சிங் வாழ்க்கை வரலாறு!

உலக அரங்கில் ஒரு மகத்தான பொருளாதார நிபுணராக அறியப்படும் இந்தியாவின் முன்னாள் பிரதமர் மன்மோகன் சிங், 2 முறை பிரதமராக தொடர்ந்து இப்பதவியை வகித்துள்ளார்.

 ஓக்ஸ்போர்டு பல்கலைக் கழகத்திலிருந்து பொருளாதாரத்தில் டாக்டர் பட்டம் பெற்ற இவர் ஐக்கிய நாடுகள் மற்றும் பல நாடுகளின் பொருளாதார ஆளுமையில் முக்கிய பதவிகளில் பணியாற்றினார். 1991 ஆம் ஆண்டு முழுமையான பொருளாதார பேரழிவின் விளிம்பில் இருந்து நாட்டை காப்பாற்றுவதில் பெரும் பங்கு செலுத்தியவர் இவர். 

நாட்டின் பொருளாதாரம் ஒரு நாகரிகமான நிலையில் இருந்து மீட்டு கட்டமைப்பில் சீர்திருத்தங்களை உருவாக்குவதன் மூலம் நிதி அமைச்சராக இருந்த போது நெருக்கடி வெற்றிகரமாக திருப்பப்பட்டது. உலக சந்தையில் வேகமாக வளர்ந்து வரும் பொருளாதாரா நாடுகளின் பட்டியலை இந்தியா அடைய மன்மோகன் சிங்கின் பங்கு முக்கியமானது. 

அவர் 1991 ல் மாநிலங்களவை உறுப்பினராக தேர்ந்தெடுக்கப்பட்டார். தொடர்ந்து நான்கு முறை மாநிலங்களவை எம்பியாக இருந்தார். 

2004 ஆம் ஆண்டு தேர்தலில் ஐக்கிய முற்போக்கு கூட்டணி வெற்றி பெற்ற பிறகு பதவியை விட்டுக்கொடுப்பதற்கு சோனியா காந்தி முடிவு செய்தபோது மன்மோகன் சிங் இந்தியாவின் பிரதமராக தேர்ந்தெடுக்கப்பட்டார். அவர் 2009ம் ஆண்டு மீண்டும் தேர்ந்தெடுக்கப்பட்டார். வாருங்கள் இவரின் வாழ்க்கை வரலாற்றை அலசுவோம்.

 பிரிக்கப்படாத இந்தியாவின் பஞ்சாப் மாகாணத்தில் உள்ள 'கஹ்' என்ற கிராமத்தில் 1932ம் ஆண்டு செப்டம்பர் 26ம் தேதி அன்று பிறந்தார். மன்மோகன் பிறந்து சில மாதங்களே இருந்த போது அவருடைய அம்மா இறந்துவிட்டார்.

 அவருடைய அப்பா வேலைகளுக்காக அடிக்கடி வெளியே சென்றுவிடுவார். தன்னுடைய உறவினர் வீட்டில் அவர் வாழ்ந்து வந்தார். அவருடைய பாட்டி, அவரை பார்த்துக் கொண்டார் என்று சஞ்சய் பாரு, 'தி ஆக்சிடெண்டல் பிரைம் மினிஸ்டர்' புத்தகத்தில் குறிப்பிட்டுள்ளார். மூத்த பத்திரிகையாளரான அவர், மன்மோகனுக்கு ஊடகவியல் ஆலோசகராக ஒருமுறை பணியாற்றியுள்ளார்.

 அவருடைய சொந்த கிராமத்தில் ஆரம்பப் பள்ளியோ, சுகாதார மையமோ இல்லை. பல மைல்கள் நடந்தே அவர் பள்ளிக்கு சென்றார். மின்சார வசதிகள் போதுமானதாக இல்லாத அந்த காலத்தில் அவர் மண்ணெண்ணெய் விளக்கு வைத்து இரவு நேரங்களில் படிப்பார். மிகவும் அமைதியான சுபாவத்தைக் கொண்ட மன்மோகன் சிங் படிப்பில் சிறந்து விளங்கினார்.

 1947ம் ஆண்டு, பிரிவினைக்குப் பிறகு மன்மோகன் சிங் அவருடைய குடும்பத்தோடு இந்தியாவுக்கு வந்தார். அவர்கள் ஆரம்பத்தில் உத்தராகண்டில் அமைக்கப்பட்டிருந்த ஹல்த்வானி அகதிகள் முகாமில் தங்கவைக்கப்பட்டனர். பிரிவினையால் ஏற்பட்ட பதட்டம் காரணமாக, அவருடைய தேர்வுகளை அவரால் எழுத முடியாமல் போனது. இந்தியாவில் அவர் அந்த தேர்வுகளை எழுதினார். பிறகு பஞ்சாப் பல்கலைக்கழகத்தில் மேற்படிப்பு படிக்க சென்றார் என்று, மூத்த பத்திரிகையாளர் மனினி சாட்டர்ஜி பிபிசி மராத்திக்கு தெரிவித்தார்.

 கடந்த 1991ம் ஆண்டில் ஒன்றிய நிதி அமைச்சராக அவர் பொறுப்பேற்ற பிறகு, அவரின் பால்ய கால நினைவுகளை விரிவாக நேர்காணல் ஒன்றில் மன்மோகன் சிங் பகிர்ந்தார் என்று சாட்டர்ஜி குறிப்பிடுகிறார். இந்தியாவுக்கு வந்த பிறகும் கூட, அவரின் குடும்ப சூழல் நிச்சயமற்றதாக இருந்தது. அகதிகள் முகாமில் வசித்த பிறகு அமிர்தசரஸ், பட்டியாலா, ஹோஷியர்பூர் மற்றும் சண்டிகர் உள்ளிட்ட இடங்களில் அவர் வாழ்ந்தார்.

 அவரின் குடும்ப சூழல் மோசமாக இருந்தது. ஆனாலும் பஞ்சாப் பல்கலைக்கழகத்தில் பட்டம் பெற்ற பிறகு தனக்கு கிடைத்த கல்வி உதவித்தொகையை வைத்து அவர் கேம்பிரிட்ஜ் மற்றும் ஆக்ஸ்ஃபோர்டு பல்கலைக்கழங்களில் மேற்படிப்புகளை மேற்கொண்டார். "அத்தகைய பல்கலைக்கழங்களுக்கு செல்லும் சூழலில் நான் இருக்கவில்லை. 

ஆனால், நான் இந்தியா வந்த பிறகு நன்றாக படித்தேன். அதிர்ஷ்டமும் எனக்கு கைகொடுத்ததால் எனக்கு இத்தகைய வாய்ப்புகள் கிடைத்தன," என்று மன்மோகன் சிங் அமெரிக்க ஊடகவியலாளர் சார்லி ரோஸுக்கு அளித்த நேர்காணலில் குறிப்பிட்டுள்ளார். இந்த நேர்காணலை அவர் 2004ம் ஆண்டு அமெரிக்காவில், ஐ.நா. நிகழ்வு ஒன்றில் பங்கேற்க சென்றபோது வழங்கினார்.

 இந்தியா ஏன் ஏழ்மையாக இருக்கிறது என்பதை புரிந்துகொள்ள நான் பொருளாதாரம் படித்தேன் என்று அவர் ஒருமுறை கூறியுள்ளார். ஏழ்மையான குடும்பத்தில் இருந்து வந்த மன்மோகன் சிங், முதலாளித்துவத்தை ஆதரித்தார். நாட்டின் ஒட்டுமொத்த வளர்ச்சிக்கு அது தேவை என்று அவர் கருதினார். கடந்த 1991ம் ஆண்டு அவர் நிதி அமைச்சராக இருந்தபோது நாட்டின் பொருளாதாரத்தை உலகத்திற்காக திறந்துவிட்டார். தாராளாமயமாக்கலை நோக்கி நாடு நகர்ந்தது. சார்லியின் அந்த நேர்காணலில், "நீங்கள் அப்படியான ஒரு குடும்ப சூழலில் இருந்து வருகிறீர்கள். 

இருந்தும் ஏன் நீங்கள் முதலாளித்துவம் மற்றும் சுதந்திர சந்தையை நம்பினீர்கள். ஏற்கனவே, இந்தியாவில் ஏழ்மையும் சமத்துவமின்மையும் நிலவுகிறது. ஏன் பொதுவுடைமைக்கும், திட்டமிடப்பட்ட பொருளாதாரத்திற்கும் ஆதரவு அளித்து அதனை மேம்படுத்த முயலவில்லை?" என்ற கேள்வி அவரிடம் கேட்கப்பட்டது. பொருளாதார சமத்துவம் என்பது குறித்து நாங்கள் தொடர்ச்சியாக சிந்தித்து வருகிறோம். ஆனால், முதலாளித்துவத்தில் வளர்ச்சிக்கான சாத்தியங்கள் இருக்கிறது. இது ஏழ்மையை ஒழிக்க உதவும் என்று சிங் கூறினார்.

 ஆக்ஸ்ஃபோர்டில் முனைவர் படிப்பை முடித்த பிறகு, அவர் பஞ்சாப் பல்கலைக்கழகத்தில் பேராசிரியராக பணியாற்றினார். பிறகு டெல்லி பொருளாதாரப் பள்ளியிலும் அவர் பேராசிரியராக பணியாற்றினார். 1971ம் ஆண்டு அவர் இந்திய அரசின் வர்த்தகத்துறையில் பொருளாதார ஆலோசகராக பணியாற்றினார். அப்போது இருந்து அவர் இந்திய அரசுக்காக பணியாற்றி வந்தார். 1972ம் ஆண்டு அவர் நிதித்துறையின் தலைமை பொருளாதார ஆலோசகராக நியமிக்கப்பட்டார்.

 பிறகு திட்ட அறிக்கையின் துணைத்தலைவர், ரிசர்வ் வங்கியின் ஆளுநர், பிரதமர் ஆலோசகர், பல்கலைக்கழக மானியக்குழுவின் தலைவர் உள்ளிட்ட முக்கிய பொறுப்புகளை அவர் வகித்தார். அவரின் அரசியல் வருகை மிகவும் சுவாரசியமானது.

 கடந்த 1991ம் ஆண்டு கோடை காலத்தில் இந்திய அரசியலில் நடந்த பல்வேறு நிகழ்வுகளை கவனித்து வந்தார் மன்மோகன் சிங். சந்திரசேகரின் ஆட்சி முடிவுக்கு வந்தது. நாடாளுமன்ற தேர்தல் பிரசாரத்தின் போது ராஜீவ் காந்தி கொல்லப்பட்டார். 

தேர்தலுக்குப் பிறகு நரசிம்ம ராவ் பிரதமர் ஆனார். அதேநேரத்தில், இந்தியாவின் பொருளாதாரம் மிகவும் மோசமாக இருந்தது. இரண்டு வாரங்களுக்குத் தேவையான எரிபொருள், உரம் மற்றும் இதர பொருட்களை வெளிநாட்டில் இருந்து இறக்குமதி செய்வதற்குத் தேவையான அந்நிய செலாவணி மட்டுமே இந்திய கருவூலத்தில் இருந்தது. ஒருபுறம், வளைகுடா நாடுகளில் நடைபெற்ற போர்களின் காரணமாக, எரிபொருளின் விலை அதிகரித்துக்கொண்டே சென்றது. மற்றொருபுறம் பொருளாதார வீழ்ச்சியை சந்தித்தது நாடு.

 இதன் காரணமாக, வெளிநாடுகளில் இருந்து எந்த விதமான கடன்களும் இந்தியாவுக்குக் கிடைக்கவில்லை. இரண்டு வாரங்களுக்குப் பிறகு நாட்டை எப்படி நடத்தப் போகிறோம் என்ற கேள்வியை எதிர்கொண்டது மத்திய அரசும் இந்திய ரிசர்வ் வங்கியும். அதேநேரத்தில், 900 மில்லியன் அமெரிக்க டாலர்கள் மதிப்பிலான முதலீட்டை வெளிநாடு வாழ் இந்தியர்கள் திரும்பப் பெற்றனர். அன்னிய செலாவணி தொடர்பான முடிவுகளை எட்டவில்லை என்றால் இந்தியாவின் இறக்குமதி 1991ம் ஆண்டு ஜூலை மாதத்தோடு ஸ்தம்பித்திருக்கும்.

 நரசிம்ம ராவ் அந்த நேரத்தில் இந்த பிரச்னைக்கு முற்றுப்புள்ளி வைக்க சிறப்பு பொருளாதார நிபுணர் தேவை என்று கருதினார். நிதி அமைச்சர் பொறுப்புக்கான ஆட்களை அவர் தேட ஆரம்பித்தார். அரசியலுக்கு வெளியே உள்ள ஒருவர் தான் இந்த பொறுப்புக்கு சரியானவர் என்றும் அவர் நம்பினார். ஐ.ஜி.பட்டீல் மற்றும் மன்மோகன் சிங் என இருவரின் பெயர்கள் அவர் முன்னால் வைக்கப்பட்டது. மன்மோகன் சிங் தேர்வு செய்யப்பட்டார். 

நரசிம்ம ராவின் நம்பிக்கைக்குரிய ஐ.ஏ.எஸ் அதிகாரி பி.சி.அலெக்சாண்டரிடம் இந்த தகவலை சிங்கிடம் தெரிவித்து, அவரின் ஒப்புதலைப் பெறும் பணிக்காக நியமிக்கப்பட்டார். அலெக்ஸாண்டர் பிரதமரின் முதன்மை செயலாளராக இந்திரா காந்தி, ராஜீவ் காந்தியின் ஆட்சிக் காலத்தில் பணியாற்றினார். இதனை தன்னுடைய சுயசரிதை புத்தகமான 'த்ரோ தி காரிடர்ஸ் ஆஃப் பவர்' என்ற புத்தகத்தில் குறிப்பிட்டுள்ளார். தூங்கி எழுந்த மன்மோகன் சிங்கிடம் அதிகாலையில் முதல் தகவலாக இதைக் கொண்டு போய் சேர்த்தார் அலெக்சாண்டர்.

 அந்த பொறுப்பை ஏற்ற அவர் இந்தியாவின் பொருளாதார கொள்கைகளில் மாற்றங்களை கொண்டு வந்தார். பொருளாதார வீழ்ச்சியில் இருந்து தப்பிக்க நாட்டின் கையிருப்பில் இருந்த தங்கம் அடமானம் வைக்கப்பட்டது. பிறகு 1991ம் ஆண்டு டிசம்பர் மாதத்தில் பொருளாதாரத்தில் ஒரு முன்னேற்றம் ஏற்பட்டது. அடமானம் வைத்த தங்கத்தை மீட்டது இந்தியா.

 நிதி அமைச்சராக பொறுப்பேற்று நாடாளுமன்ற பயணத்தை துவங்கினார் சிங். தேர்தலுக்குப் பிறகு முதல் பட்ஜெட்டை தாக்கல் செய்தார் அவர். பிரான்ஸ் எழுத்தாளரும் அரசியல்வாதியுமான விக்டர் ஹூகோவின் பிரபலமான வாசகத்தை மேற்கோள்காட்டி தன்னுடைய உரையை அவர் முடித்தார். "ஒருவருக்கான காலம் கைக்கூடினால், பூமியில் எந்த சக்தியும் அவரின் சிந்தனைகளை நிறுத்த முடியாது" என்று விக்டர் ஹூகோவை மேற்கோள் காட்டி கூறினார்.

 "இந்தியா அதனுடைய சந்தையை உலக நாடுகளுக்காக திறந்தது. இந்தியாவின் பொருளாதாரத்தில் பல மாற்றங்களை ஏற்படுத்த உள்ளது. உலகத்தில் உள்ள எந்த சக்தியும் இனி நம்மை தடுக்க முடியாது," என்று பேசினார் அவர். 1991ம் ஆண்டு ஜூலை மாதம் 24ம் தேதி இந்தியாவின் பொருளாதார சந்தை உலக நாடுகளுக்காக திறந்துவிடப்பட்டது.

 இந்த புதிய பொருளாதார கொள்கையின் விளைவாகவே, 2024ம் ஆண்டு 3 டிரில்லியன் அமெரிக்க டாலர் பொருளாதாரத்தை இந்தியா எட்டியுள்ளது. மிகப்பெரிய பொருளாதாரத்தைக் கொண்ட ஐந்தாவது நாடாக இந்தியா திகழ்கிறது. 2004ம் ஆண்டு, நடைபெற்ற நாடாளுமன்ற தேர்தலில் அடல் பிஹாரி வாஜ்பாய் தோற்கடிக்கப்பட்டார்.

 அன்றைய காங்கிரஸ் கட்சியின் தலைவர் சோனியா காந்தி பிரதமராவார் என்ற எதிர்பார்ப்பு நிலவியது. ஆனால், பாஜகவினர், குறிப்பாக சுஷ்மா ஸ்வராஜ் கடுமையான எதிர்ப்புகளை பதிவு செய்தார். "இந்தியா சுதந்திரம் அடைந்து 60 ஆண்டுகள் ஆன பிறகு, வெளிநாட்டை சேர்ந்த ஒருவர் இந்தியாவின் முக்கியமான பொறுப்பில் பணியாற்றுவார் என்றால் நான் மொட்டை அடித்துக்கொண்டு, செருப்பு அணியாமல், வெள்ளை புடவை உடுத்தி, தரையில் தூங்குவேன்," என்று விமர்சனம் செய்தார். காங்கிரஸ் பாஜகவின் எதிர்ப்பைப் பெரிதாக எடுத்துக் கொள்ளவில்லை. சோனியா கூட்டணி கட்சிகளின் மூத்தத் தலைவர்களை சந்தித்து பேசினார். கூட்டணி ஆட்சியை உருவாக்கும் முனைப்பில் அவர் இருந்தார். அதன் பின்னால் நடந்த நிகழ்வுகளை பத்திரிகையாளர் நீர்ஜா சௌத்ரி தன்னுடைய 'ஹவ் பிரைம் மினிஸ்டர்ஸ் டிசைட்' என்ற புத்தகத்தில் குறிப்பிட்டுள்ளார்.

 இந்தியாவின் 13வது பிரதமராக 2004ம் ஆண்டு பொறுப்பேற்றார் மன்மோகன். இந்தியாவின் பொருளாதாரத்தில் பல மாற்றங்கள் நிகழ்ந்தன. இந்தியாவின் பொருளாதார வளர்ச்சி 7 முதல் 8% ஆக உயர்ந்தது. இந்த ஆட்சிக்காலத்தின் போது ஊரக வேலைவாய்ப்பு உறுதித் திட்டமான நூறு நாள் வேலைவாய்ப்பு திட்டம், ஆர்.டி.ஐ. மூலம் கல்வியை அடிப்படை உரிமைகளில் ஒன்றாக சேர்த்தது போன்ற முக்கிய முடிவுகள் எட்டப்பட்டன.

 இந்தியா - அமெரிக்கா அணு ஆயுத ஒப்பந்தம் மன்மோகன் சிங்குக்கு சவாலாக முடிந்தது. இதனைத் தொடர்ந்து, எதிர்க்கட்சியினர் நம்பிக்கையில்லா தீர்மானத்தை முன்மொழிந்தனர். அரசுக்கு அளித்த ஆதரவை விளக்கிக் கொண்டது இடதுசாரி கட்சிகள். ஆனாலும், சிங்கின் ஆட்சி வெற்றி கண்டது. இந்த காலக்கட்டத்தில் மற்றொமொரு வரலாற்று ரீதியான முடிவை அறிவித்தது மன்மோகன் சிங்கின் அரசாங்கம். அதன்படி, விவசாயக் கடன்கள் ரத்து செய்யப்பட்டன. மகாராஷ்டிராவின் யவத்மல் பகுதிக்கு வந்த அவர் இந்த அறிவிப்பை வெளியிட்டார்.

 அவரின் அந்த முடிவால் தான் ஐக்கிய முற்போக்குக் கூட்டணி அதிகாரத்தை மீண்டும் கைப்பற்றியது என்று நிபுணர்கள் கூறுகின்றனர். ஆனால், மன்மோகன் சிங்கின் இரண்டாவது ஆட்சி காலம் சவாலாக இருந்தது. நிதி மோசடிகள் தொடர்பாக அவருடைய அரசாங்கம் கடுமையான விமர்சனங்களை எதிர்கொண்டது. அன்னா ஹசாரே ஊழலுக்கு எதிரான இயக்கத்தைத் தொடங்கினார். 

ஓடும் பேருந்தில் இளம்பெண் ஒருவர் பாலியல் வன்கொடுமைக்கு ஆளான நிகழ்வும் பெரும் அதிர்ச்சியை ஏற்படுத்தியது. நாடு தழுவிய போராட்டங்கள் நடைபெற்றன. உலகப் புகழ்பெற்ற பொருளாதார நிபுணராக அறியப்பட்ட சிங்கால் தன்னுடைய ஆட்சியில் நடைபெற்ற மோசடிகளை தடுக்க இயலவில்லை என்ற விமர்சனத்தை எதிர்கொண்டார்.

 மன்மோகன் சிங் எந்த தேர்தலிலும் போட்டியிடவில்லை. ஆனால், உலக அரங்கில் ஒரு மகத்தான பொருளாதார நிபுணராக அறியப்படுகிறார்.

1993 மற்றும் 1994 ஆம் ஆண்டுகளில் ஆசியாவின் நிதி அமைச்சர் விருது, ஆசியா மணி விருது, யூரோமணி விருது, நிதி ஆண்டின் நிதி அமைச்சர் விருது, ஆகிய விருதுகளை பெற்றுள்ளார்.