இலங்கையில் நீர் மூலம் பரவும் நோய்கள் அதிகரிப்பு: சுகாதாரத் துறை அவசர எச்சரிக்கை!
இலங்கையில் அண்மைக்காலமாக ஏற்பட்ட காலநிலை மாற்றங்கள், வெள்ளப் பெருக்கு மற்றும் தொடர் மழைவீழ்ச்சியைத் தொடர்ந்து, நீர் மற்றும் உணவு மூலம் பரவக்கூடிய தொற்றுநோய்கள் அதிகரிக்கும் அபாயம் ஏற்பட்டுள்ளதாக சுகாதார அமைச்சின் தொற்றுநோய் தடுப்புப் பிரிவு எச்சரித்துள்ளது.
குறிப்பாக, மாசுபட்ட குடிநீர் மற்றும் தேங்கி நிற்கும் நீர்நிலைகள் காரணமாகப் பல மாவட்டங்களில் தொற்றுநோயாளர்களின் எண்ணிக்கை அதிகரித்து வருவதாக அதிகாரிகள் சுட்டிக்காட்டியுள்ளனர்.
தற்போதைய சூழலில் எலிக் காய்ச்சல் பரவும் வேகம் கணிசமாக அதிகரித்துள்ளது. விவசாயப் பகுதிகள் மட்டுமன்றி, வெள்ளப் பாதிப்புக்குள்ளான நகர்ப்புறங்களிலும் இந்நோய் பரவி வருகிறது.
தேங்கி நிற்கும் சேற்று நீர் அல்லது வெள்ள நீரில் உள்ள எலி, நாய் மற்றும் கால்நடைகளின் சிறுநீர் மூலமாக கிருமிகள் மனித உடலுக்குள் (சிறிய காயங்கள் வழி) ஊடுருவக்கூடும் என எச்சரிக்கப்பட்டுள்ளது.
தூய்மையற்ற குடிநீர் மற்றும் சுகாதாரமற்ற முறையில் தயாரிக்கப்படும் உணவுகள் மூலம் வயிற்றுப்போக்கு (Diarrhoea), டைபாய்டு காய்ச்சல் (Typhoid), மற்றும் கல்லீரலைத் தாக்கும் ஹெபடைடிஸ் ஏ (Hepatitis A) போன்ற நோய்கள் பரவும் அபாயம் ஏற்பட்டுள்ளது.
வெள்ள நீர் உட்புகுந்த குடிநீர் கிணறுகள் முற்றிலும் மாசடைந்துள்ளதால், அவற்றை முறையாக சுத்திகரித்து குளோரின் (Chlorine) இடுவதற்கு முன்னர் பயன்படுத்துவது ஆபத்தானது என அறிவிக்கப்பட்டுள்ளது.
காய்ச்சல், கடுமையான தலைவலி, உடல் தசை வலி அல்லது வயிற்றுப்போக்கு போன்ற அறிகுறிகள் தென்பட்டால், உடனடியாக அருகில் உள்ள அரச மருத்துவமனைக்குச் சென்று சிகிச்சை பெறுமாறு பொதுமக்களுக்கு அறிவுறுத்தப்பட்டுள்ளது.
(வீடியோ இங்கே )
இச்செய்திக்கு பிரதான அனுசரணை
வீடியோ இங்கே
