நாட்டில் வரவிருக்கும் ஓகஸ்ட் மாதம் வரை நுகர்வுக்குத் தேவையான எரிபொருள் கையிருப்பு தாராளமாக உள்ளதாக இலங்கை பெற்றோலியக் கூட்டுத்தாபனம் (CPC) உத்தியோகபூர்வமாக அறிவித்துள்ளது.

இது குறித்து இலங்கை பெற்றோலியக் கூட்டுத்தாபனத்தின் முகாமைத்துவ பணிப்பாளர் மயூர நெத்திகுமாரகே விடுத்துள்ள விசேட அறிவிப்பில், நாட்டின் எரிபொருள் விநியோகத்தை தடையின்றி முன்னெடுப்பதற்கான அனைத்து ஏற்பாடுகளும் பூர்த்தி செய்யப்பட்டுள்ளதாகக் குறிப்பிட்டுள்ளார்.

எதிர்வரும் நவம்பர் மாதம் வரையிலான காலப்பகுதிக்குத் தேவையான எரிபொருள் கொள்வனவுகளுக்கான முன்பதிவுகள் மற்றும் ஆர்டர்கள் அனைத்தும் ஏற்கனவே வெற்றிகரமாகச் செய்து முடிக்கப்பட்டுள்ளதாக முகாமைத்துவ பணிப்பாளர் சுட்டிக்காட்டியுள்ளார்.

இதன் காரணமாக பொதுமக்கள் எவ்வித தட்டுப்பாடு குறித்தும் அச்சமடையத் தேவையில்லை என அவர் உறுதியளித்துள்ளார். இலங்கையை நோக்கி வரும் மசகு எண்ணெய் கப்பல்கள் தற்போது கடலில் பயணித்துக் கொண்டிருக்கும் இரண்டு பிரம்மாண்ட மசகு எண்ணெய் தாங்கிக் கப்பல்கள் இம்மாத இறுதிக்குள் நாட்டை வந்தடையவுள்ளன:

அமெரிக்காவிலிருந்து 90,000 மெற்றிக் தொன் மசகு எண்ணெயை (Crude Oil) ஏற்றிக்கொண்டு புறப்பட்டுள்ள கப்பல், இம்மாதம் 28 ஆம் திகதி கொழும்புத் துறைமுகத்தை வந்தடையவுள்ளது.

இதனைத் தொடர்ந்து, மற்றுமொரு மசகு எண்ணெய் தாங்கிய கப்பல் இம்மாதம் 31 ஆம் திகதி நாட்டை வந்தடையும் என எதிர்பார்க்கப்படுகிறது.

இந்த மசகு எண்ணெய் கப்பல்களின் வருகையானது நாட்டின் சுத்திகரிப்பு நிலையங்களின் தொடர்ச்சியான செயல்பாட்டிற்கும், உள்நாட்டு எரிபொருள் விநியோக ஸ்திரத்தன்மைக்கும் பெரும் பக்கபலமாக அமையும் என எதிர்பார்க்கப்படுகிறது.

வீழ்ச்சியடைந்துள்ள எரிபொருள் நுகர்வு இதேவேளை, தற்போது நாட்டில் எரிபொருள் நுகர்வு கணிசமான அளவு குறைந்துள்ளதாக மயூர நெத்திகுமாரகே இதன்போது சுட்டிக்காட்டியுள்ளார். 

நுகர்வு வீழ்ச்சியடைந்துள்ளமை மற்றும் புதிய இறக்குமதிகள் திட்டமிட்டபடி நாட்டை வந்தடைகின்றமை ஆகிய காரணங்களால், நாட்டில் எரிபொருள் இருப்பு மிகவும் பாதுகாப்பான மட்டத்தில் உள்ளதாக பெற்றோலியக் கூட்டுத்தாபனம் மேலும் தெரிவித்துள்ளது.

லங்கா4 (Lanka4)

(வீடியோ இங்கே )

இச்செய்திக்கு பிரதான அனுசரணை

வீடியோ இங்கே