சர்வதேச அரங்கில் பிரகாசித்த பிரதமர்: லண்டன் பல்கலைக்கழகத்தில் முக்கிய உரை!
"அரசியல் என்பது அபிவிருத்தியில் இருந்து பிரிக்க முடியாத ஓர் அங்கமாகும். அரச நிர்வாகத்தில் எடுக்கப்படும் ஒவ்வொரு முடிவும், தெரிவும், கொள்கையும் அரசியல் சூழலாலும் அதன் நோக்கங்களாலும் வடிவமைக்கப்படுகின்றன" எனப் பிரதமர் கலாநிதி ஹரிணி அமரசூரிய தெரிவித்துள்ளார்.
இங்கிலாந்திற்கு உத்தியோகபூர்வ விஜயம் மேற்கொண்டுள்ள பிரதமர், அங்குள்ள புகழ்பெற்ற 'University of Sussex' பல்கலைக்கழகத்தின் அபிவிருத்தி ஆய்வுக் கழகத்தின் (Institute of Development Studies) 60ஆவது ஆண்டு நிறைவு விழாவில் பிரதான விருந்தினராகக் கலந்துகொண்டு விசேட உரையாற்றியபோதே இக்கருத்தை வெளியிட்டுள்ளார்.
இலங்கையின் தற்போதைய அரசியல் மற்றும் பொருளாதார நிலைமைகளைச் சான்றாகக் காட்டி, அரசியல், நிர்வாகம் மற்றும் அபிவிருத்தி ஆகியவற்றுக்கு இடையிலான நெருங்கிய தொடர்பு குறித்துப் பிரதமர் விரிவாக விளக்கினார்.
ஒரு நாட்டின் அபிவிருத்தி என்பது வெறும் பொருளாதார வளர்ச்சியால் மட்டும் தீர்மானிக்கப்படுவதில்லை எனவும், அதற்கு மக்களின் நம்பிக்கை, அரசியல் நிலைத்தன்மை, பொறுப்புணர்வான நிர்வாகம் மற்றும் சமூக நீதி (Social Justice) போன்ற அம்சங்களும் முக்கிய பங்காற்றுகின்றன என்றும் அவர் சுட்டிக்காட்டினார்.
மக்களின் எதிர்பார்ப்புகளுக்குப் பதிலளிக்கும் பொறுப்புடன் செயல்பட வேண்டிய அவசியத்தையும், அதேவேளையில் ஜனநாயகப் பொறுப்புக்கூறலைப் பாதுகாத்து நாட்டின் பொருளாதார மீட்சியை முன்னெடுத்துச் செல்ல வேண்டிய சவால்களையும் பிரதமர் உலக அரங்கில் எடுத்துரைத்தார்.
தற்போதைய தேசிய மக்கள் சக்தி (NPP) அரசாங்கமானது சமூகப் பாதுகாப்பு திட்டங்கள், பொருளாதார மறுசீரமைப்புகள் மற்றும் அரச நிறுவனங்களின் செயல்திறன் மேம்பாடு ஆகியவற்றைச் சமநிலைப்படுத்துவதைத் தனது முக்கிய நோக்கமாகக் கொண்டு செயல்பட்டு வருவதாகப் பிரதமர் ஹரிணி அமரசூரிய குறிப்பிட்டார்.
தேசிய பொருளாதாரத்தில் ஊதியம் பெறும் மற்றும் ஊதியம் பெறாத பராமரிப்புப் பணிகளின் (Care Work) முக்கியத்துவத்தைப் பிரதமர் தனது உரையில் விசேடமாக வலியுறுத்தினார்.
குறிப்பாகப் பெண்கள் அதிகமாக ஈடுபட்டு வரும் பராமரிப்புத் துறையின் பங்களிப்பு நீண்டகாலமாகப் பொருளாதாரக் கணக்கெடுப்புகளில் உரிய மதிப்பீட்டைப் பெறவில்லை எனச் சுட்டிக்காட்டிய அவர், பெண்கள் எதிர்கொள்ளும் சவால்கள் மற்றும் அவர்களின் உழைப்பைத் தங்களது அரசாங்கம் கொள்கை ரீதியாகக் கவனத்தில் கொண்டு செயல்பட்டு வருவதாக உறுதியளித்தார்.
பல்கலைக்கழகப் பேராசிரியர்கள், சர்வதேச ஆய்வாளர்கள் முன்னிலையில் இலங்கைப் பிரதமர் ஆற்றிய இந்த உரை தற்போதைய புதிய அரசாங்கத்தின் தூரநோக்குச் சிந்தனையைச் சர்வதேச மட்டத்தில் பறைசாற்றுவதாக அமைந்துள்ளது.
(வீடியோ இங்கே )
இது தொடர்பா வேற என்னலாம் நடந்திருக்குனு தெரிஞ்சுக்கலாமா?
சிறப்பு கட்டுரை
சினிமா செய்திகள்
வர்த்தக வியாபாரங்கள்
இலங்கை மாவட்ட செய்திகள்
