கடந்த 2015 ஆம் ஆண்டு நல்லாட்சி அரசாங்கக் காலத்தில், சஷி வீரவங்ச போலி ஆவணங்கள், தவறான பிறப்புச் சான்றிதழ் மற்றும் தவறான அடையாள அட்டையைப் பயன்படுத்தி குடிவரவு குடியகல்வு திணைக்களத்தை ஏமாற்றி, அதிகாரப்பூர்வ இராஜதந்திர கடவுச்சீட்டைப் பெற்றதாகக் குற்றம் சாட்டப்பட்டு குற்றப்புலனாய்வுத் திணைக்களத்தினரால் (CID) கைது செய்யப்பட்டார்.

அவர் தனது உண்மையான பிறப்புத் திகதி மற்றும் விபரங்களை மறைத்து, புதிய விபரங்களின் கீழ் இந்த ஆவணங்களைப் பெற்றதாக சி.ஐ.டி நீதிமன்றத்தில் குற்றம் சாட்டியிருந்தது.

இந்த வழக்கை விசாரித்த கொழும்பு முதன்மை நீதவான் நீதிமன்றம், கடந்த 2022 ஆம் ஆண்டு மே மாதம் சஷி வீரவங்சவுக்கு இரண்டு ஆண்டுகள் கடுமையான சிறைத்தண்டனையும், 20,000 ரூபா அபராதமும் விதித்து தீர்ப்பளித்தது. கீழ் நீதிமன்றத்தின் தீர்ப்புக்கு எதிராக சஷி வீரவங்ச தரப்பில் கொழும்பு மேல் நீதிமன்றத்தில் (High Court) மேல்முறையீடு செய்யப்பட்டது.

மேல்முறையீட்டு மனு பரிசீலனைக்கு எடுத்துக்கொள்ளப்பட்டதை அடுத்து, மேல் நீதிமன்றம் அவருக்கு நிபந்தனைகளுடன் கூடிய பிணை வழங்கியது. தற்போது பிணையில் இருக்கும் அவர், இந்த வழக்கின் வழக்கமான விசாரணைத் தவணைகளுக்காக கொழும்பு நீதவான் நீதிமன்றத்தில் முன்னிலையாகி வருகிறார்.

இன்றைய விசாரணையின் போது, குற்றம் சாட்டப்பட்ட தரப்பால் சமர்ப்பிக்கப்பட்டதாகக் கூறப்படும் சில முக்கிய ஆவணங்களின் உண்மைத்தன்மை குறித்து விவாதிக்கப்பட்டது. நீதிமன்றத்தில் சமர்ப்பிக்கப்பட்ட தரவுகள் கணினியில் புதிதாக உருவாக்கப்பட்டவை அல்ல, மாறாக அவை ஏற்கனவே இருந்த மூல ஆவணங்களில் இருந்து ஸ்கேன் செய்யப்பட்டு கணினி தரவுத்தளத்தில் (Database) சேமிக்கப்பட்டவை என பிரதி சொலிசிட்டர் ஜெனரல் தெளிவுபடுத்தினார்.

இந்த ஆவணங்கள் எவ்வாறு உள்ளீடு செய்யப்பட்டன என்பதைத் துல்லியமாகக் கண்டறிய, சம்பந்தப்பட்ட கணினி அமைப்பை (Computer System) விரிவான ஆய்வுக்கு உட்படுத்த வேண்டியுள்ளது. 

இதற்கான சட்டப்பூர்வ அறிவித்தலை அடுத்த தவணையில் தாக்கல் செய்ய சி.ஐ.டி தீர்மானித்துள்ளது. இதனைத் தொடர்ந்தே வழக்கு ஜூலை 24 ஆம் திகதிக்கு ஒத்திவைக்கப்பட்டது.

லங்கா4 (Lanka4)

(வீடியோ இங்கே )