இலங்கையில் போக்குவரத்து விதிமீறல்களுக்கான அபராதங்களை இணையவழியில் செலுத்துவதற்கு பயன்படுத்தப்படும் உத்தியோகபூர்வ 'GovPay' கட்டணத் தளத்தைப் போன்றே போலியாக வடிவமைக்கப்பட்ட இணையதளம் மூலம் புதிய நிதி மோசடி ஒன்று அரங்கேறி வருவதாக காவல்துறை எச்சரித்துள்ளது.

வாகன ஓட்டுநர்களின் சிசிடிவி (CCTV) காட்சிகளின் அடிப்படையில், போக்குவரத்து விதிமீறல்களுக்கான அபராதப் பணத்தை வசூலிப்பதாகக் கூறியே இந்த மோசடி செய்யப்படுவதாக காவல்துறை தெரிவித்துள்ளது. மோசடிக்காரர்கள் பொதுமக்களை இலக்கு வைத்து +63 969 216 1720 என்ற வெளிநாட்டுத் தொலைபேசி எண்ணிலிருந்து குறுஞ்செய்திகள் (SMS) அல்லது வாட்ஸ்அப் (WhatsApp) செய்திகளை அனுப்புகின்றனர். 

அதில், சம்பந்தப்பட்ட நபர் போக்குவரத்து விதிமீறலில் ஈடுபட்டுள்ளதாக போலியான எச்சரிக்கை விடுக்கப்பட்டு, அதனுடன் இணைக்கப்பட்டுள்ள இணையதள முகவரியை (Link) கிளிக் செய்து அபராத தொகையைச் செலுத்துமாறு அறிவுறுத்தப்படுகிறார்கள்.

இந்த மோசடிக்காகப் பயன்படுத்தப்படும் இணையதளமானது, அரசாங்கத்தின் உத்தியோகபூர்வ “Gov Pay” இணையதளத்தை அச்சு அசலாக ஒத்திருக்குமாறு மிகவும் நுணுக்கமாக வடிவமைக்கப்பட்டுள்ளதாக காவல்துறை சுட்டிக்காட்டியுள்ளது. 

பொதுமக்கள் இதில் தங்களின் வங்கி அட்டை விபரங்களை (Bank Card Details, OTP) உள்ளிட்டதும், அவர்களின் கணக்குகளிலிருந்து மோசடிக்காரர்கள் நேரடியாகப் பணத்தைத் திருடுகின்றனர்.

எனவே, இதுபோன்ற அடையாளம் தெரியாத எண்களில் இருந்து வரும் சந்தேகத்திற்கிடமான குறுஞ்செய்திகளுக்குப் பதிலளிப்பதைத் தவிர்க்குமாறும், அவற்றுடன் வரும் இணையதள முகவரிகளை (Links) எக்காரணம் கொண்டும் கிளிக் செய்ய வேண்டாம் என்றும் காவல்துறை பொதுமக்களைக் கேட்டுக்கொண்டுள்ளது. 

அசல் GovPay சேவையை உங்களது வங்கியின் அதிகாரப்பூர்வ மொபைல் பேங்கிங் செயலி மூலமாகவே பாதுகாப்பாக அணுக முடியும் என்றும் அதிகாரிகள் தெளிவுபடுத்தியுள்ளனர்.

லங்கா4 (Lanka4)

(வீடியோ இங்கே )