உண்மையான தலைமைத்துவம் பதவிகளால் அளவிடப்படுவதில்லை - பிரதமர்!
உண்மையான தலைமைத்துவம் என்பது பதவிகளாலோ அல்லது அதிகாரத்தாலோ அளவிடப்படுவதில்லை, மாறாக பொறுப்புடன் செயல்படும் திறன், இரக்கம் காட்டுதல் மற்றும் பிறரின் நலனுக்காக உழைத்தல் ஆகியவற்றால் அளவிடப்படுகிறது என்று பிரதமர் ஹரிணி அமரசூரிய தெரிவித்துள்ளார்.
கொழும்பில் இலங்கை பெண் வழிகாட்டிகள் சங்கத்தால் ஏற்பாடு செய்யப்பட்ட ஜனாதிபதி வழிகாட்டி விருது மற்றும் பிரதமர் விருது வழங்கும் விழாவில் கலந்துகொண்டபோது உரையாற்றியபோது அவர் இவ்வாறு குறிப்பிட்டுள்ளார்.
இதன்போது மேலும் கருத்து வெளியிட்ட அவர், கடந்த காலத்தில் பெண்களுக்குக் குறைவான வாய்ப்புகளே இருந்தபோதிலும், இன்று பெருகிவரும் வாய்ப்புகளின் காரணமாக, சிறுமிகளும் இளம் பெண்களும் அனைத்துத் துறைகளிலும் குறிப்பிடத்தக்க முன்னேற்றம் அடைந்து வருவதாக தெரிவித்தார்.
அத்துடன் ஒவ்வொரு சிறுமிக்கும் இளம் பெண்ணுக்கும் தங்களது திறன்களையும் ஆற்றல்களையும் வளர்த்துக்கொள்ளச் சமமான வாய்ப்புகள் வழங்கப்பட வேண்டும் என்று அவர் வலியுறுத்தினார்.
மேலும், நாட்டிற்கு ஒரு சிறந்த எதிர்காலத்தைக் கட்டமைக்கப் பங்களிக்கத் தயாராக இருக்கும் ஒரு புதிய தலைமுறைப் பெண் தலைவர்கள் இலங்கைக்குத் தேவை என்றும் அவர் கூறினார்.
குறிப்பாக, இலங்கை தனது பொருளாதார மற்றும் ஜனநாயக சீர்திருத்தங்களைத் தொடரும் இவ்வேளையில், பொருளாதார வளர்ச்சியுடன் வலுவான அறநெறி விழுமியங்களையும் சமூகப் பொறுப்பையும் வளர்ப்பதன் முக்கியத்துவத்தையும் பிரதமர் எடுத்துரைத்தார்.
பொறுப்புள்ள, திறமையான, மற்றும் சமூக உணர்வுள்ள இளம் குடிமக்களை வளர்ப்பதில் இலங்கை பெண் வழிகாட்டிகள் சங்கத்தின் பங்களிப்பை அவர் பாராட்டினார்.
இச்செய்திக்கு பிரதான அனுசரணை
வீடியோ இங்கே
