மருத்துவமனை கூரையில் கத்தியுடன் நின்ற இளைஞர்: பரபரப்பு சம்பவம்

வேல்ஸ், செயின்ட் அசாப் பகுதியில் உள்ள Ysbyty Glan Clwyd மருத்துவமனையில் இடம்பெற்ற சம்பவம் நோயாளிகள், உறவினர்கள் மற்றும் மருத்துவ ஊழியர்களிடையே பெரும் அதிர்ச்சியை ஏற்படுத்தியுள்ளது.

26 வயதான லியோன் கில்லெஸ்பி என்ற இளைஞர், மருத்துவமனையின் கூரை மீது கருப்பு நிற உடையுடன் ஏறி நின்றதுடன், கையில் நீளமான கத்தி போன்ற பொருளையும் வைத்திருந்தார். 

அவரது தோற்றம் பலரால் “Grim Reaper” போன்றதாகக் கூறப்பட்ட போதிலும், விசாரணையின் போது அது காகம் போன்ற உடை என அவரது தரப்பில் தெரிவிக்கப்பட்டது.

கூரை மீது இருந்து அவர் சத்தமிட்டதால் மருத்துவமனையில் இருந்தவர்கள் அச்சமடைந்தனர். உடனடியாக பொலிஸாருக்கும் தீயணைப்புப் பிரிவினருக்கும் தகவல் வழங்கப்பட்டு மீட்பு நடவடிக்கை முன்னெடுக்கப்பட்டது. 

அதிர்ஷ்டவசமாக எவருக்கும் காயம் ஏற்படவில்லை. பின்னர் பொலிஸார் அவரை பாதுகாப்பாக கீழே இறக்கினர். இந்தச் செயலுக்கான காரணத்தை அவர் தெரிவிக்கவில்லை. 

மருத்துவமனை வளாகத்தில் நியாயமான காரணமின்றி இடையூறு ஏற்படுத்திய குற்றச்சாட்டில் அவர் மீது வழக்குத் தொடரப்பட்டது. நீதிமன்றத்தில் குற்றத்தை ஒப்புக்கொண்ட அவருக்கு 100 பவுண்ட் அபராதம், 100 பவுண்ட் வழக்கு செலவு மற்றும் 50 பவுண்ட் இழப்பீடு செலுத்த உத்தரவிடப்பட்டது.

மேலும், உள்ளூர் கடைகளில் செல்லப்பிராணி பொருட்கள், உணவு மற்றும் பானங்களை திருடிய குற்றச்சாட்டுகளையும் அவர் ஒப்புக்கொண்டார்.

இந்த சம்பவத்தை தொடர்ந்து, Betsi Cadwaladr University Health Board நிர்வாகம், மருத்துவமனை வளாகங்களில் மிரட்டல் மற்றும் இடையூறு ஏற்படுத்தும் எந்தவொரு நடவடிக்கைக்கும் சகிப்புத்தன்மை வழங்கப்படாது என தெரிவித்துள்ளது.

மக்கள் பாதுகாப்பையும் சிகிச்சையையும் எதிர்பார்த்து வரும் மருத்துவமனை ஒன்றில் இடம்பெற்ற இந்த சம்பவம் தற்போது பரவலாக பேசப்பட்டு வருகிறது.

இச்செய்திக்கு பிரதான அனுசரணை

வீடியோ இங்கே