இலங்கைக்கு 100 அதிநவீன மின்சார சொகுசு பேருந்துகளை வழங்கும் சீனா

சுற்றுச்சூழல் மாசுபாட்டைக் குறைத்து, இலங்கையின் பொதுப் போக்குவரத்துத் துறையை நவீனமயப்படுத்தும் நோக்கில், சீன அரசாங்கம் இலங்கைக்கு 100 அதிநவீன மின்சார சொகுசு பேருந்துகளை (Electric Luxury Buses) நன்கொடையாக வழங்கவுள்ளதாக தெரிவிக்கப்பட்டுள்ளது.

இலங்கைக்கான சீனத் தூதுவர் கி ஷென்ஹொங் (Qi Zhenhong), மல்வத்து மற்றும் அஸ்கிரிய பீடங்களின் மகாநாயக்க தேரர்களைச் சந்தித்தபோது இந்தத் திட்டம் தொடர்பான தகவல்களை வெளியிட்டதாக தெரிவிக்கப்படுகிறது.

பாரம்பரிய எரிபொருட்களின் பயன்பாட்டால் ஏற்படும் கார்பன் உமிழ்வு மற்றும் காற்று மாசுபாட்டைக் குறைப்பதே இத்திட்டத்தின் முக்கிய நோக்கமாகக் குறிப்பிடப்பட்டுள்ளது.

இதன்படி, இலங்கைக்கு 100 நவீன மின்சார பேருந்துகள் வழங்கப்படவுள்ளதுடன், ஒரு பேருந்தின் மதிப்பு சுமார் 225,000 அமெரிக்க டொலர்கள் என மதிப்பிடப்பட்டுள்ளது.

குறித்த பேருந்துகள் பிரதானமாக கொழும்பு – கண்டி மற்றும் கொழும்பு – காலி உள்ளிட்ட முக்கிய வழித்தடங்களில் சேவையில் ஈடுபடுத்தப்படவுள்ளதாக தெரிவிக்கப்படுகிறது.

மின்னேற்ற வசதிகளுக்கும் கோரிக்கை மின்சார பேருந்துகளை தடையின்றி இயக்குவதற்குத் தேவையான Charging Infrastructure உள்ளிட்ட மின்னேற்ற வசதிகளையும் வழங்குமாறு போக்குவரத்து அமைச்சின் ஊடாக சீன அரசாங்கத்திடம் கோரிக்கை முன்வைக்கப்பட்டுள்ளதாக கூறப்படுகிறது.

அத்துடன், பேருந்துகளை இயக்குதல் மற்றும் தொழில்நுட்ப ரீதியாக பராமரித்தல் தொடர்பாக இலங்கை போக்குவரத்து சபை (SLTB) ஊழியர்களுக்கு விசேட பயிற்சிகளை வழங்குவதற்கும் நடவடிக்கை எடுக்கப்படவுள்ளதாக தெரிவிக்கப்பட்டுள்ளது.

வீதிகள் மற்றும் பாலங்கள் புனரமைப்பு அண்மைய இயற்கை அனர்த்தங்கள் மற்றும் வெள்ளப்பெருக்கினால் பாதிக்கப்பட்ட பகுதிகளிலுள்ள வீதிகள் மற்றும் பாலங்களை புனரமைப்பது தொடர்பான ஆய்வுகளை மேற்கொள்வதற்காக சீன நிபுணர்கள் குழுவொன்று இலங்கைக்கு வருகை தந்துள்ளதாகவும் தெரிவிக்கப்படுகிறது.

பொதுப் போக்குவரத்துக்கும் மேலதிக உதவி 100 மின்சார பேருந்துகள் தொடர்பான திட்டத்திற்கு மேலதிகமாக, இலங்கையின் பொதுப் போக்குவரத்துத் தரத்தை மேம்படுத்தும் நடவடிக்கைகளின் ஒரு பகுதியாக சீனாவின் Foton International Corporation நிறுவனத்திடமிருந்து 104 புதிய Metro பேருந்துகள் இலங்கைக்கு கொண்டுவரப்பட்டுள்ளதாகவும் குறிப்பிடப்பட்டுள்ளது.

கல்வித்துறைக்கும் சீனாவின் உதவி பொதுப் போக்குவரத்துத் துறைக்கு மட்டுமன்றி இலங்கையின் கல்வித்துறைக்கும் சீனா பல்வேறு உதவிகளை வழங்கியுள்ளதாக தெரிவிக்கப்பட்டுள்ளது.

அதன்படி, இலங்கை பாடசாலை மாணவர்களுக்காக 15 மில்லியன் மீட்டர் வெள்ளை நிற சீருடைத் துணிகள் வழங்கப்பட்டுள்ளதுடன், நாட்டின் 500 பாடசாலைகளில் 900 Smart Classrooms அமைக்கும் திட்டங்களும் முன்னெடுக்கப்பட்டுள்ளதாக தெரிவிக்கப்படுகிறது.

இத்தகைய திட்டங்கள் இலங்கையின் பொதுப் போக்குவரத்தை நவீனமயப்படுத்துவதுடன், சுற்றுச்சூழலுக்கு உகந்த பசுமைப் போக்குவரத்து முறையை நோக்கி நகர்வதற்கும் உதவும் என எதிர்பார்க்கப்படுகிறது.

இச்செய்திக்கு பிரதான அனுசரணை

வீடியோ இங்கே