முஸ்லிம் தாதியர் ஆடை உரிமைக்கான தொடக்கப்புள்ளியும் இன்றைய தொடர்ச்சியும்

இன்று மீண்டும் பேசப்படும் முஸ்லிம் தாதியர் ஆடை விவகாரம் புதியதல்ல; இதன் வேர்கள் 34 ஆண்டுகளுக்கு முன் பாராளுமன்றத்தில் நடந்த ஒரு வரலாற்று நிகழ்வில் உள்ளன.

1992ம் ஆண்டு ஆகஸ்ட் 7ம் திகதி, மட்டக்களப்பு மாவட்ட பாராளுமன்ற உறுப்பினராக இருந்த கலாநிதி எம்.எல்.ஏ.எம். ஹிஸ்புல்லாஹ் அவர்கள், முஸ்லிம் பெண் தாதியர்களின் ஆடை உரிமை தொடர்பான தனிநபர் மசோதா ஒன்றை பாராளுமன்றத்தில் சமர்ப்பித்தார்.

இம்மசோதா பெரும்பான்மை வாக்குகளுடன் நிறைவேற்றப்பட்டது. தமது மத நம்பிக்கைகளை பேணிக்கொண்டே அதிகமான முஸ்லிம் பெண்கள் நாட்டின் சுகாதாரத் துறையில் சேவையாற்ற வழிவகை செய்யும் நோக்கில், முஸ்லிம் சமூகத்தினரின் கோரிக்கைகளை அடிப்படையாகக் கொண்டு இது முன்வைக்கப்பட்டது.

ஆனால் 34 ஆண்டுகளுக்குப் பிறகும் அதே கோரிக்கை தொடர்கிறது. கல்முனை வடக்கு வைத்தியசாலையில் முஸ்லிம் பெண் தாதியர்களின் ஆடை தொடர்பாக எழுந்த தடை பிரச்சினை, தற்போது தேசிய கவனத்தை ஈர்த்துள்ளது.

இது தொடர்பாக திருகோணமலை மாவட்ட பாராளுமன்ற உறுப்பினர் இம்ரான் மஹ்ரூப் அவர்கள், முஸ்லிம் பெண்களின் ஆடை விவகாரத்தில் அரசாங்கம் உறுதியான தீர்மானத்திற்கு வரவேண்டும் என வலியுறுத்தியுள்ளார்.

இந்த விவகாரம் தொடர்பாக சுகாதார அமைச்சு தலைமையில் பாராளுமன்ற வளாகத்தில் விசேட கூட்டமொன்றும் நடைபெற்றது, இதில் முஸ்லிம் மற்றும் தமிழ் அரசாங்க பாராளுமன்ற உறுப்பினர்களும் கலந்துகொண்டனர்.

இங்கு வரலாறு நமக்கு சொல்வது என்ன?

1992ம் ஆண்டு பாராளுமன்றம் ஏற்கனவே இந்த உரிமையை அங்கீகரித்திருந்தும், 2026ம் ஆண்டிலும் இதே கேள்வி மீண்டும் எழுவது மத அடையாளத்தையும் தொழில்சார் கடமையையும் இணைத்துக்கொள்ளும் உரிமை நடைமுறையில் எவ்வளவு உறுதியற்றதாக உள்ளது என்பதைக் காட்டுகிறது. 

வரலாற்றுப் பாடத்தை நினைவூட்டுவதன் மூலம், தற்போதைய தீர்வுக்கான விவாதத்திற்கு ஒரு அடித்தளத்தை இது வழங்குகிறது.

இச்செய்திக்கு பிரதான அனுசரணை

வீடியோ இங்கே