ஆட்சி அதிகாரம் தந்தையிடம் இருந்து மகனுக்கு கைமாறும் நடைமுறையை ஒழிக்க ஜனாதிபதி அழைப்பு

அரசியல் அதிகாரம் தந்தையிடமிருந்து மகனுக்குக் கைமாறும் நடைமுறையைக் கேள்விக்குள்ளாக்கியுள்ள ஜனாதிபதி அனுர குமார திஸாநாயக்க, இலங்கையின் அரசியல் கலாச்சாரத்தில் ஒரு பெரும் மாற்றத்தை ஏற்படுத்த வேண்டும் என்று வலியுறுத்தியுள்ளார்.

 "தந்தை ஜனாதிபதியாகும்போது மகனும் ஜனாதிபதியாக வேண்டும் என்று சிலர் கருதினர். அந்த நிலையை நாம் மாற்ற வேண்டும்," என்று அவர் அழைப்பு விடுத்தார். 

கஹடகஸ்திகிலியவில்  நேற்று (13) நடைபெற்ற பொதுக்கூட்டம் ஒன்றில் உரையாற்றும்போது ஜனாதிபதி குறிப்பிட்டார். 

 அரசாங்கத்தின் ஸ்திரத்தன்மை குறித்த கவலைகளாலேயே இக்கூட்டங்கள் ஏற்பாடு செய்யப்படுவதாக முன்வைக்கப்பட்ட கருத்துக்களை நிராகரித்த அவர், அரசாங்கத்திற்கு எந்த அச்சுறுத்தலும் இல்லை என்றும், அச்சமடைய வேண்டிய அவசியம் இல்லை என்றும் கூறினார். 

நாட்டை மீளக் கட்டியெழுப்ப வலுவான மக்கள் இயக்கம் அவசியம் என்று கூறிய ஜனாதிபதி திஸாநாயக்க, நாட்டின் அரசியல், சமூக மற்றும் பொருளாதாரக் கட்டமைப்புகளில் அடிப்படை மாற்றங்கள் தேவை என்றும் வலியுறுத்தினார்.

கடந்தகால அரசியல் நடைமுறைகளை விமர்சித்த அவர், முன்னதாக அரசியல்வாதிகள் பொதுமக்களை விட உயர்ந்தவர்களாகக் கருதப்பட்டு நடத்தப்பட்டனர் என்று குறிப்பிட்டார். 

 செப்டம்பர் 2024 முதல் NPP அரசாங்கம் மேற்கொண்ட மாற்றங்களையும் சுட்டிக்காட்டிய ஜனாதிபதி திஸாநாயக்க, காலாவதியான அரசியல் நடைமுறைகள் மற்றும் சலுகைகளை ஒழிக்கும் நடவடிக்கைகளை அரசாங்கம் தொடங்கியுள்ளதாகக் கூறினார். 

 அரசியல்வாதிகளுக்கான பாதுகாப்பு ஏற்பாடுகளில் செய்யப்பட்ட மாற்றங்களைச் சுட்டிக்காட்டிய அவர், கிராமங்களுக்குச் செல்லும் அரசியல்வாதிகளுடன் சென்ற பெருமளவிலான வாகன அணிவகுப்புகள் இனி வழக்கமான நடைமுறையாக இல்லை என்று கூறினார். "இப்போது பொலிஸார் பொதுமக்களின் பாதுகாப்பிற்காக மட்டுமே உள்ளனர்," என்றும் அவர் விளக்கினார். 

நாட்டை ஒரு புதிய திசையில் கொண்டு செல்லவும், பழைய அரசியல் கலாச்சாரம் என்று அவர் விவரித்த முறையை மாற்றவும் அரசாங்கம் நடவடிக்கை எடுத்துள்ளது என்று ஜனாதிபதி தெரிவித்தார்.

இச்செய்திக்கு பிரதான அனுசரணை

வீடியோ இங்கே