எதிர்ப்புகளை தாண்டி 22 ஆவது சட்டமூலம் நிறைவேற்றம் - 158 பேர் ஆதரவு
நீதிபதிகளின் ஓய்வுபெறும் வயதை உயர்த்துவதை நோக்கமாகக் கொண்ட அரசியலமைப்பின் இருபத்தி இரண்டாவது திருத்தச் சட்டமூலத்தின் மூன்றாம் வாசிப்பு, திருத்தங்களுடன் நாடாளுமன்றத்தில் சிறப்புப் பெரும்பான்மையுடன் நிறைவேற்றப்பட்டுள்ளது.
158 உறுப்பினர்கள் இந்த அரசியலமைப்புத் திருத்தத்திற்கு ஆதரவாகவும், 63 பேர் எதிர்த்தும் வாக்களித்தனர். சட்டமூலத்தின் மூன்றாம் வாசிப்பு மீதான வாக்கெடுப்பின்போது எவரும் வாக்களிப்பை புறக்கணிக்கவில்லை.
இதனைத் தொடர்ந்து நாடாளுமன்றச் சபாநாயகர் இச்சட்டமூலத்தின் மீது தனது சான்றை உறுதிப்படுத்திய பின்னர், இது அரசியலமைப்பின் இருபத்தி இரண்டாவது திருத்தச் சட்டமாக நடைமுறைக்கு வரும்.
நீதி மற்றும் தேசிய ஒருங்கிணைப்பு அமைச்சர் ஹர்ஷன நானயக்காரவால் சமர்பிக்கப்பட்ட இந்த சட்டமூலத்திற்கு பிரதான எதிர்கட்சிகள் எதிர்ப்பு தெரிவித்திருந்தன.
அரசியலமைப்பின் இருபத்தி இரண்டாவது திருத்தச் சட்டமூலமானது, உச்ச நீதிமன்றம் மற்றும் மேன்முறையீட்டு நீதிமன்ற நீதிபதிகளின் ஓய்வுபெறும் வயதை மாற்றுவதற்கான ஏற்பாடுகளை (மற்றும் பிற திருத்தங்களையும்) உள்ளடக்கியுள்ளது.
முன்மொழியப்பட்ட இந்த அரசியலமைப்புத் திருத்தம், உச்ச நீதிமன்ற நீதிபதிகளின் கட்டாய ஓய்வுபெறும் வயதை 65-லிருந்து 67-ஆகவும், மேன்முறையீட்டு நீதிமன்ற நீதிபதிகளின் ஓய்வுபெறும் வயதை 63-லிருந்து 65-ஆகவும் உயர்த்துவதை நோக்கமாகக் கொண்டுள்ளது.
