தங்கப் பதக்கம் வென்ற ருமேஷ் தரங்கவிற்கு ஜனாதிபதி அநுர வாழ்த்து
ஜப்பானில் நடைபெற்ற 2026 ஆசிய விளையாட்டுப் போட்டிகளில் ஈட்டி எறிதல் (javelin throw) பிரிவில் தங்கப் பதக்கம் வென்ற இலங்கை வீரர் ருமேஷ் தரங்க பத்திரகேவுக்கு ஜனாதிபதி அனுர குமார திஸாநாயக்க வாழ்த்து தெரிவித்துள்ளார்.
இந்தச் சாதனையை ஒட்டுமொத்த தேசத்திற்கும் பெருமை சேர்க்கும் நிகழ்வாக அவர் வர்ணித்துள்ளார். 'எக்ஸ்' (X) தளத்தில் பதிவிட்ட செய்தியில், பத்திரகேவுக்கு வாழ்த்துகளைத் தெரிவித்த ஜனாதிபதி திஸாநாயக்க, ஒலிம்பிக் தங்கப் பதக்கத்தை வெல்வதற்கான தனது முயற்சியைத் தொடருமாறும் அவரை ஊக்குவித்தார்.
சர்வதேச அரங்கில் வெற்றியை நோக்கிச் செல்லும் பத்திரகே மற்றும் ஏனைய இலங்கை விளையாட்டு வீரர்களுக்குத் தொடர்ந்து ஆதரவளிக்க அரசாங்கம் உறுதியுடன் இருப்பதாகவும் ஜனாதிபதி குறிப்பிட்டார்.
"வானத்தைத் தொடும் அளவுக்கு உயர்ந்த இலக்குகளை நோக்கி முன்னேறுங்கள் ருமேஷ் - தேசம் முழுவதுமே உங்களுக்குப் பின்னால் உறுதுணையாக நிற்கிறது" என்று ஜனாதிபதி குறிப்பிட்டுள்ளார்.
நகோயா நகரில் உள்ள மிசுஹோ பூங்கா தடகள மைதானத்தில் நடைபெற்ற ஆண்களுக்கான ஈட்டி எறிதல் போட்டியில், 88.55 மீட்டர் தூரம் ஈட்டியை எறிந்து பத்திரகே தங்கப் பதக்கத்தை வென்றார்.
