தலவத்துகொடையில் இணையவழி சூதாட்டத்தில் ஈடுபட்ட 8 இந்தியர்கள் கைது
பணத்திற்காக சட்டவிரோத இணையவழி சூதாட்டத்தில் ஈடுபட்டதாகக் கூறப்படும் குற்றச்சாட்டின் பேரில் தலங்கம பொலிஸாரால் எட்டு இந்தியர்கள் கைது செய்யப்பட்டுள்ளனர்.
தலவத்துகொடை பகுதியில் உள்ள ஒரு வீட்டில் தங்கியிருக்கும் சிலர், கணினிகள் மற்றும் அலைபேசிகளைப் பயன்படுத்தி சட்டவிரோத இணையவழி சூதாட்டத்தில் ஈடுபடுவதாகக் கிடைத்த தகவலின் அடிப்படையில், அக்டோபர் 4ம் திகதி விசாரணைகள் தொடங்கப்பட்டதாகப் பொலிஸார் தெரிவித்தனர்.
கடுவெல நீதவான் நீதிமன்றத்திடமிருந்து பெறப்பட்ட தேடுதல் வாரண்டின் அடிப்படையில், குற்றப் பதிவுப் பிரிவு (Criminal Records Division), குற்றப் புலனாய்வுத் திணைக்களத்தின் (CID) கணினி குற்றங்கள் விசாரணைப் பிரிவு மற்றும் பொலிஸ் சுற்றுலாப் பிரிவு ஆகியவற்றின் அதிகாரிகள் அந்த வீட்டில் சோதனை நடத்தினர்.
அங்கு தங்கியிருந்த எட்டு வெளிநாட்டினருடன், ஆறு கணினிகள், 39 அலைபேசிகள் மற்றும் கணினி சார்ந்த பிற உபகரணங்களும் கைப்பற்றப்பட்டு, அவர்கள் கைது செய்யப்பட்டனர்.
