இயற்பியல் துறைக்கான நோபல் பரிசு வென்ற பெல்ஜியம் விஞ்ஞானி

ஐஸ்கியூப் (IceCube) நியூட்ரினோ ஆய்வகத்திற்கான பங்களிப்புகள் மற்றும் வானியற்பியல் தோற்றம் கொண்ட உயர் ஆற்றல் நியூட்ரினோக்களைக் கண்டறிந்ததற்காக, பிரான்சிஸ் ஹால்சன் இயற்பியலுக்கான நோபல் பரிசை வென்றுள்ளார்.

"பிரான்சிஸ் ஹால்சன், எங்களுக்கு ஒரு அற்புதமான கருவியை வழங்கிய ஆராய்ச்சியாளர்கள் மற்றும் பொறியாளர்களின் சர்வதேசக் குழுவை வழிநடத்தியுள்ளார். அவரது விடாமுயற்சியும் அறிவியல் தொலைநோக்குப் பார்வையும் ஒரு புதிய வகையான வானியல் துறைக்கு வழிவகுத்துள்ளன" என்று இயற்பியலுக்கான நோபல் குழுவின் தலைவர் மார்க் பியர்ஸ் ஒரு செய்திக்குறிப்பில் தெரிவித்தார்.

பெல்ஜியத்தில் பிறந்த 82 வயதான இந்த விஞ்ஞானி, அமெரிக்காவில் உள்ள விஸ்கான்சின்-மாடிசன் பல்கலைக்கழகத்துடன் இணைந்து பணியாற்றி வருகிறார். 

அதன் இணையதளத் தகவலின்படி, ஐஸ்கியூப் நியூட்ரினோ ஆய்வகம் என்பது அண்டார்டிகாவின் தென் துருவத்தில் அமைந்துள்ள ஒரு ஆராய்ச்சி மையமாகும்; விஸ்கான்சின்-மாடிசன் பல்கலைக்கழகம் இதன் முதன்மை நிறுவனமாகச் செயல்படுகிறது.

தென் துருவத்தில் நியூட்ரினோக்களைக் கண்டறிவது தொடர்பான ஹால்சனின் ஆராய்ச்சிப் பணிகள் 1980களிலேயே தொடங்கின. ஸ்டாக்ஹோமில் உள்ள ராயல் ஸ்வீடிஷ் அறிவியல் அகாடமி இந்தப் பரிசை அறிவித்தது.

உலகின் உயரிய அங்கீகாரமாகக் கருதப்படும் நோபல் பரிசு மருத்துவம், இயற்பியல், வேதியியல், இலக்கியம், பொருளாதாரம் மற்றும் அமைதி என 6 முக்கிய துறைகளுக்கு ஆண்டுதோறும் வழங்கப்பட்டு வருகிறது குறிப்பிடத்தக்கது.