பொருளாதார வளர்ச்சியை மையமாகக் கொண்ட IMF இன் மற்றொரு ஒப்பந்தத்தில் இணைய அரசாங்கம் முயற்சி

தற்போதைய சர்வதேச நாணய நிதிய (IMF) ஒப்பந்தம் நிறைவடைந்த பிறகு, மற்றொரு திட்டத்தில் இணைந்துகொள்வதற்கான வாய்ப்பை இலங்கை நிராகரிக்கவில்லை என்றும், ஆனால் இது குறித்து அரசாங்கம் இன்னும் இறுதி முடிவை எடுக்கவில்லை என்றும் ஜனாதிபதி அனுர குமார திஸாநாயக்க தெரிவித்துள்ளார்.

 சிலோன் வர்த்தக சம்மேளனம் ஏற்பாடு செய்திருந்த கலந்துரையாடல் ஒன்றில் உரையாற்றிய ஜனாதிபதி, இவ்வாறு குறிப்பிட்டுள்ளார்.

இதன்போது மேலும் கருத்து வெளியிட்ட அவர், தற்போதைய IMF திட்டத்தின் கீழ் எட்டப்பட்ட பொருளாதார ஸ்திரத்தன்மையைப் பாதுகாத்துக்கொண்டு, அதேவேளையில் பொருளாதார வளர்ச்சியை மையமாகக் கொண்ட ஒரு புதிய ஒப்பந்தத்தை மேற்கொள்வதற்கான சாத்தியக்கூறுகளை அரசாங்கம் ஆராய்ந்து வருவதாகக் குறிப்பிட்டார். 

பொருளாதார ஸ்திரத்தன்மையை மீட்டெடுப்பதில் இலங்கை குறிப்பிடத்தக்க முன்னேற்றம் கண்டுள்ள போதிலும், அந்நியச் செலாவணி கையிருப்பு இன்னும் விரும்பிய அளவை எட்ட வேண்டியுள்ளது என்றும், நாட்டின் கடன் தகுதி நிலையில் மேலும் முன்னேற்றம் தேவை என்றும் அவர் கூறினார். 

பொருளாதார நெருக்கடிக்குப் பின்னர் பொருளாதார ஸ்திரத்தன்மையை மீட்டெடுப்பதிலேயே தற்போதைய IMF திட்டம் பெரும்பாலும் கவனம் செலுத்தியதாகவும், ஆனால் அடுத்த கட்டமானது அந்த ஸ்திரத்தன்மைக்குக் குந்தகம் விளைவிக்காத வகையில் வளர்ச்சிக்கே முன்னுரிமை அளிக்க வேண்டும் என்றும் ஜனாதிபதி தெரிவித்தார். 

 நாட்டின் பொருளாதார வளர்ச்சி இலக்குகளுக்கு ஆதரவளிக்கும் வகையிலான ஒரு புரிதலை எட்ட முடிந்தால், IMF-உடன் புதிய ஒப்பந்தம் ஒன்றை மேற்கொள்ள அரசாங்கம் தயாராக இருக்கும் என்று அவர் கூறினார்.

 எதிர்காலத்தில் அமையக்கூடிய IMF திட்டம் எந்த வடிவில் இருக்க வேண்டும் என்பதைத் தீர்மானிக்க, நிதி அமைச்சகம் மற்றும் மத்திய வங்கி உள்ளிட்ட அரசாங்கத்தின் சிரேஷ்ட பொருளாதார அதிகாரிகளுக்கு இடையே கலந்துரையாடல்கள் நடைபெற்று வருவதாகவும் ஜனாதிபதி தெரிவித்தார். 

 இருப்பினும், IMF உடனான தொடர்பிலிருந்து முழுமையாக விலகிக்கொள்ளவோ ​​அல்லது மற்றொரு திட்டத்தில் ஈடுபட உறுதியளிக்கவோ அரசாங்கம் இன்னும் முடிவெடுக்கவில்லை என்பதை அவர் வலியுறுத்தினார். 

 இறுதி முடிவு என்பது இலங்கையின் பொருளாதார நிலை, அந்நியச் செலாவணி கையிருப்பின் வலிமை மற்றும் ஏற்படக்கூடிய வெளிநாட்டுப் பொருளாதார அதிர்ச்சிகளின் தாக்கம் ஆகியவற்றைப் பொறுத்தே அமையும் என்று அவர் கூறினார். 

மத்திய கிழக்குப் பிராந்தியத்தில் நிலவும் மோதல்களின் தாக்கத்தைச் சுட்டிக்காட்டிய ஜனாதிபதி, தற்போதைய போக்கு தொடர்ந்தால், 2025-இல் சுமார் 4.4 பில்லியன் டாலராக இருக்கும் எரிபொருள் இறக்குமதிச் செலவு, 2026-இல் சுமார் 6 பில்லியன் டொலராக அதிகரிக்கக்கூடும் என்று எச்சரித்தார். 

 இத்தகைய சூழல்கள் பொருளாதாரம் எதிர்கொள்ளும் நிச்சயமற்ற தன்மையையும், மேலதிக வெளிநாட்டு அழுத்தங்களை இலங்கை தாங்கிக்கொள்ள முடியுமா என்பதை மதிப்பிட வேண்டியதன் அவசியத்தையும் உணர்த்துவதாக அவர் கூறினார். 

 அரசாங்கத்தின் பொருளாதார இலக்குகளுக்கும் தற்போதைய திட்டத்தின் கீழ் மேற்கொள்ளப்பட்ட உறுதிப்பாடுகளுக்கும் இடையே முரண்பாடுகள் மிகக் குறைவாகவே இருந்தன என்று கூறிய ஜனாதிபதி, IMF உடனான அரசாங்கத்தின் ஒத்துழைப்பையும் நியாயப்படுத்தினார். 

 இதன் காரணமாகவே, பெரிய கருத்து வேறுபாடுகள் ஏதுமின்றி அரசாங்கத்தால் இத்திட்டத்தைத் தொடர்ந்து செயல்படுத்த முடிந்தது என்றும் அவர் குறிப்பிட்டார்.

 தற்போதைய ஏற்பாட்டின் கீழ் இன்னும் ஏறத்தாழ ஆறு மாத கால அவகாசம் எஞ்சியுள்ளதாகவும், சர்வதேச நாணய நிதியத்துடனான தனது எதிர்கால உறவு குறித்து முடிவெடுப்பதற்கு முன்னர், அரசு தனது அடுத்தகட்ட நடவடிக்கைகளை மதிப்பீடு செய்ய இந்தக் காலகட்டத்தைப் பயன்படுத்திக்கொள்ளும் என்றும் ஜனாதிபதி குறிப்பிட்டார்.