இம்ரான் கான் ஆதரவு மாகாணத்தில் ஆளுநர் ஆட்சி: பாகிஸ்தானில் அரசியல் நெருக்கடி தீவிரம்

பாகிஸ்தானின் கைபர் பக்துன்க்வா மாகாணத்தில் அவசரகால நிலை மற்றும் ஆளுநர் ஆட்சியை அமுல்படுத்தியதைத் தொடர்ந்து அரசியல் பதற்றம் அதிகரித்துள்ளது.

கடந்த ஒக்டோபர் 11ஆம் திகதி அமுல்படுத்தப்பட்ட இந்த நடவடிக்கையால், முன்னாள் பிரதமர் இம்ரான் கானின் பாகிஸ்தான் தெஹ்ரீக்-இ-இன்சாப் (PTI) கட்சியின் தலைமையிலான மாகாண அரசாங்கத்தின் அதிகாரங்கள் இடைநிறுத்தப்பட்டுள்ளன.

மாகாணத்தில் அதிகரித்து வரும் பயங்கரவாதச் செயற்பாடுகளைக் கட்டுப்படுத்தும் நோக்கில், அரசியலமைப்புக்கு அமைவாகவே இந்த நடவடிக்கை எடுக்கப்பட்டுள்ளதாக பாகிஸ்தான் மத்திய அரசாங்கம் தெரிவித்துள்ளது.

இதற்கிடையில், மாகாண அரசாங்கம் பயங்கரவாதக் குழுக்களுடன் தொடர்புகளைப் பேணி வருவதாக மத்திய தகவல் அமைச்சர் அத்தாவுல்லா தரார் குற்றஞ்சாட்டியுள்ளார். 

எனினும், இந்தக் குற்றச்சாட்டுகளை நிராகரித்துள்ள PTI, மத்திய அரசாங்கத்தின் நடவடிக்கை அரசியல் நோக்கம் கொண்டது எனத் தெரிவித்துள்ளது.

அவசரகால நிலை அறிவிக்கப்பட்டதைத் தொடர்ந்து, பெஷாவர் உள்ளிட்ட பகுதிகளில் வீதிகளில் கொள்கலன்கள் வைக்கப்பட்டு போக்குவரத்துக் கட்டுப்பாடுகள் விதிக்கப்பட்டுள்ளன. 

மேலும், சில பகுதிகளில் பாதுகாப்புக் காரணங்களால் பாடசாலைகளும் மூடப்பட்டுள்ளன.

இந்நிலையில், கடந்த ஒக்டோபர் 13ஆம் திகதி கைபர் மாவட்டத்தின் பாரா பகுதியில் இம்ரான் கானின் ஆதரவாளர்களுக்கும் காவல்துறையினருக்கும் இடையில் மோதல்கள் இடம்பெற்றுள்ளன. 

போராட்டத்தைக் கட்டுப்படுத்தும் வகையில் காவல்துறையினர் கண்ணீர்ப்புகைப் பிரயோகம் மேற்கொண்டதாக சர்வதேச ஊடகங்கள் செய்தி வெளியிட்டுள்ளன.

முன்னாள் பிரதமர் இம்ரான் கானை விடுதலை செய்யக் கோரியும், மத்திய அரசாங்கத்தின் நடவடிக்கைகளுக்கு எதிர்ப்புத் தெரிவித்தும் அவரது ஆதரவாளர்கள் தொடர்ந்து போராட்டங்களில் ஈடுபட்டு வருகின்றனர்.

இந்தச் சூழ்நிலையில், கைபர் பக்துன்க்வா மாகாணத்தில் அரசாங்கத்துக்கும் PTI கட்சிக்கும் இடையிலான மோதல்கள் மேலும் தீவிரமடையக்கூடும் என்ற அச்சம் ஏற்பட்டுள்ளது.

மாகாணத்தின் பாதுகாப்பு நிலைமை மற்றும் அரசியல் நிலைத்தன்மை தொடர்பில் அடுத்தகட்ட நடவடிக்கைகள் கவனிக்கப்பட்டு வருகின்றன.