பாதாள உலகிற்கு மரண அடி: ‘குடு சலிந்து’ மற்றும் ‘கரந்தெனிய சுத்தா’வின் கோடி பெறுமதியான சொத்துக்கள் முடக்கம்!
போதைப்பொருள் கடத்தல் மூலம் சம்பாதித்ததாகச் சந்தேகிக்கப்படும், ‘குடு சலிந்து’ எனப்படும் போதைப்பொருள் கடத்தல்காரரின் சகாவுக்கு சொந்தமானதாகக் கூறப்படும் சுமார் 25 மில்லியன் ரூபாய் பெறுமதியான சொத்துக்களை முடக்குவதற்கு சட்டவிரோத சொத்துக்கள் விசாரணைப் பிரிவு நடவடிக்கை எடுத்துள்ளது.
இதன்படி, பாணந்துறை மாலமுல்ல பகுதியில் அமைந்துள்ள சுமார் 20 மில்லியன் ரூபாய் பெறுமதியான இருமாடி வீடு மற்றும் தலா மதிப்பிடப்பட்ட இரண்டு காணிகள் உள்ளிட்ட சொத்துக்கள் இரண்டு வாரங்களுக்கு முடக்கப்பட்டுள்ளதாக காவல்துறை ஊடகப் பிரிவு தெரிவித்துள்ளது.
இந்த விசாரணை தொடர்பில், பாணந்துறை எலுவில பகுதியைச் சேர்ந்த 45 வயதுடைய ஒருவரும் கைது செய்யப்பட்டுள்ளார்.
இதேவேளை, ‘கரந்தெனிய சுத்தா’ எனப்படும் ஒழுங்கமைக்கப்பட்ட குற்றச்செயல்களுடன் தொடர்புடையவருக்குச் சொந்தமானதாகக் கூறப்படும் சுமார் 8 மில்லியன் ரூபாய் பெறுமதியான பேருந்து ஒன்றும் இரண்டு வாரங்களுக்கு முடக்கப்பட்டுள்ளது.
கடந்த பெப்ரவரி 13ஆம் திகதி தலங்கம பகுதியில் வாகனத் தரிப்பிடத்தில் சட்டத்தரணி ஒருவரையும் அவரது மனைவியையும் தாக்குவதற்காக வந்த துப்பாக்கிதாரியை ஏற்றிச் செல்லப் பயன்படுத்தப்பட்ட பேருந்து இதுவாக இருக்கலாம் என காவல்துறையினர் சந்தேகிக்கின்றனர்.
