நீராடச் சென்று காணாமல் போன ஐந்தாவது நபரின் சடலமும் மீட்பு
பதுளை கெரண்டி நீர்வீழ்ச்சியில் நீராடச் சென்று காணாமல் போன ஐந்தாவது நபரின் சடலம் இன்று (30) பிற்பகல் கண்டெடுக்கப்பட்டுள்ளது.
பல மணிநேரமாக இடம்பெற்ற தேடுதல் நடவடிக்கையின்போது காணாமல் போன 22 வயது யுவதியின் சடலம் கண்டெடுக்கப்பட்டுள்ளது.
அடம்பிட்டிய - நாவல வீதியில் வசிக்கும் 11 பேர் கொண்ட குழுவினர் நேற்று (29) பிற்பகல் கெரண்டி நீர்வீழ்ச்சியில் குளிப்பதற்கு வந்துள்ளனர்.
அவர்கள் நீந்திக் கொண்டிருந்த போது, நான்கு யுவதிகளும் மற்றும் ஒரு இளைஞன் வெள்ளத்தில் அடித்துச் செல்லப்பட்டனர்.
அவர்களில் 19 முதல் 23 வயதுடைய நான்கு யுவதிகளும் 23 வயது இளைஞனும் அடங்குவர்.
பின்னர் பிரதேசவாசிகளின் உதவியுடன் பொலிஸார் மேற்கொண்ட நடவடிக்கையின் போது அவர்களில் நால்வரின் சடலங்கள் கண்டெடுக்கப்பட்டன.
அவர்கள் பாறையில் உட்கார்ந்து, ஒருவருக்கொருவர் கைகளைப் பிடித்து, நான்கு பேரையும் கீழே இழுத்தனர் என சம்பவத்தை நேரில் பார்த்த ஒருவர் தெரிவித்துள்ளார்.
உயிரிழந்தவர்களில் ஒரே குடும்பத்தைச் சேர்ந்த இரண்டு சகோதரிகளும் அடங்குவர்.
உயிரிழந்தவர்கள் அடம்பிட்டிய தோட்டத்தின் முதலாம் பகுதியைச் சேர்ந்த ராஜா டேவிட் குமார் (23), சிவ சுப்பிரமணியம் காஞ்சனா பிரியா (21), பவானி சந்திரேல்கா (23), ஹரிமலா தேவி சிந்து (19) மற்றும் சிரியா (20) என அடையாளம் காணப்பட்டுள்ளனர்.
ஏரி ஆழமாக இருப்பதால் அதில் குளிப்பதற்கு எவரும் அனுமதிக்கப்படவில்லை என அடம்பிட்டிய பொலிஸார் தெரிவித்தனர்.
அடம்பிட்டிய பொலிஸாரும் பதுளை எலடலுவ இராணுவ முகாமும் இணைந்து சடலங்களை மீட்கும் நடவடிக்கையை முன்னெடுத்திருந்தனர்.
காணாமல் போன சிறுமியின் சடலம் முதலில் கிடைக்காததையடுத்து, இராணுவ முகாம் அதிகாரிகள் நீண்ட நேரம் தேடிய பின்னர் இன்று மாலை சடலத்தை கண்டெடுத்துள்ளனர்.
பதுளை, அடம்பிட்டிய தோட்டத்தின் முதல் பகுதியிலுள்ள வீடொன்றில் இடம்பெற்ற அன்னதான நிகழ்வில் கலந்து கொண்ட பதினொரு பேர் கொண்ட குழுவொன்றே நீர்வீழ்ச்சியில் குளிப்பதற்குச் சென்றதாக தெரிவிக்கப்படுகிறது.
