பொய்யான தகவல்களை சமர்ப்பித்து அரச வங்கிகளில் 68 மில்லியன் ரூபா கடனை பெற்ற நபர்கள்
2017ஆம் ஆண்டு அரச அடமானம் மற்றும் முதலீட்டு வங்கியில் போலியான ஆவணங்களை தயாரித்து பொய்யான தகவல்களை சமர்ப்பித்து 47 பேர் 68 மில்லியன் ரூபா கடனை பெற்றுள்ளதாக கோப் குழு குறிப்பிட்டுள்ளது.
கடனாளிகளாக அடையாளம் காணப்பட்ட நபர்களுக்கு எதிராக வழக்குகள் தாக்கல் செய்யப்பட்டுள்ளதாகவும், இது தொடர்பாக சிஐடி தொடர்ந்து விசாரணை நடத்தி வருவதாகவும் அங்கிருந்த அதிகாரிகள் தெரிவித்தனர்.
குறிப்பாக ஊழியர்கள் மீது ஒழுங்கு நடவடிக்கை எடுக்கப்பட்டுள்ளது.
விசாரணைகள் நிறைவடைந்தவர்களுக்கு எதிராக ஏற்கனவே ஒழுக்காற்று நடவடிக்கை எடுக்கப்பட்டுள்ளதாகவும் அவர்கள் மேலும் சுட்டிக்காட்டினர்.
மேலும், வெளியாட்கள் இருவர் குற்றப் புலனாய்வுப் பிரிவினரால் கைது செய்யப்பட்டுள்ளதாகவும் அவர்களில் ஒருவர் உயிரிழந்துள்ளதாகவும் அதிகாரிகள் தெரிவித்துள்ளனர்.
குறிப்பாக புதிய தலைவர் மற்றும் பணிப்பாளர் சபை நியமிக்கப்பட்டதன் பின்னர் இந்த கடன்களை பெற்றுக்கொள்ள துரித நடவடிக்கை எடுக்கப்பட்டுள்ளதாகவும் குறிப்பிடப்பட்டுள்ளது.
இதன்படி, இந்த நடவடிக்கைகளை உரிய முறையில் முன்னெடுக்குமாறு கோப் குழுவின் தலைவர், அங்கிருந்த அதிகாரிகளுக்கு பணிப்புரை விடுத்தார்.
அரச அடமானம் மற்றும் முதலீட்டு வங்கியின் 2017 மற்றும் 2018 ஆம் நிதியாண்டுகளுக்கான கணக்காய்வாளர் நாயகத்தின் அறிக்கைகள் மற்றும் தற்போதைய செயற்பாடுகளை ஆராய்வதற்காக நேற்று (23) பாராளுமன்ற உறுப்பினர் பேராசிரியர் சரித ஹேரத் தலைமையில் கூடிய பொது நிறுவனங்கள் தொடர்பான குழுக் கூட்டத்தில் இது குறித்து கலந்துரையாடப்பட்டது.
