கோடீஸ்வரர்களை வரியில் இருந்து தப்பிக்கவிடும் சுங்க அதிகாரிகள்: வெளிவந்த அறிக்கை

கோடீஸ்வர தொழிலதிபர்கள் மற்றும் நண்பர்களை வரி திட்ட வலையில் இருந்து தப்பிக்க 600 இற்கு மேற்பட்ட சுங்க மற்றும் வருமான வரித்துறை அதிகாரிகள் உதவுவது பற்றிய உண்மைகளை உளவுத்துறை அமைப்புகள் அரசுக்கு தெரிவித்துள்ளன.

அரசாங்கத்திற்கு சமர்ப்பிக்கப்பட்ட விசேட புலனாய்வு அறிக்கையின் மூலம் இந்த உண்மைகள் தெரியவந்துள்ளதாக அரசாங்கத் தகவல்கள் தெரிவிக்கின்றன.

இதனால், இந்த மோசடி அதிகாரிகள் தொடர்பான மேலதிக விபரங்களை வழங்குமாறு புலனாய்வுத் துறைக்கு அரசாங்கம் ஏற்கனவே அறிவித்துள்ளது. இதேவேளை, இலங்கை சுங்கம் மற்றும் உள்நாட்டு இறைவரித் திணைக்களம் தமது பல்வேறு ஊழல் மோசடிகள் மற்றும் முறைகேடுகளினால் வருடாந்தம் அறவிடக்கூடிய பத்தாயிரம் கோடிக்கும் அதிகமான வரியை இழந்து வருவதாக அரசாங்கத்திற்கு விசேட ஆய்வொன்றில் தெரியவந்துள்ளது.
இந்நிலைமையை தடுக்கும் வகையில், வருமான முகாமைத்துவத்துக்கான முறையான நிறுவனமொன்றை நிறுவுவது தொடர்பில் அரசாங்கத்தின் உயர் மட்டம் கவனம் செலுத்தியுள்ளதாக தெரிவிக்கப்படுகிறது.

அதிகாரிகளின் தவறான நடவடிக்கைகளினால் பெருமளவான வரி வருமானம் இழக்கப்படுவதாக ஜனாதிபதி ரணில் விக்கிரமசிங்க தலைமையில் இடம்பெற்ற ஆளும் கட்சி பாராளுமன்ற உறுப்பினர்கள் குழு கூட்டத்தில் விரிவாக ஆராயப்பட்டது.

நாடாளுமன்ற உறுப்பினர்களான மஹிந்தானந்த அளுத்கமகே மற்றும் ரோஹித அபேகுணவர்தன ஆகியோர் அங்கு உண்மைகளை விரிவாக விளக்கியிருந்தனர்.

பல்வேறு மோசடிகளால் இழந்த வருமானத்தை மீளப் பெற்றுக் கொண்டால் நாட்டின் பொருளாதார நெருக்கடிக்கு கணிசமான அளவில் தீர்வு காண முடியும் என இந்த சந்திப்பில் பாராளுமன்ற உறுப்பினர்கள் பலரும் ஜனாதிபதியிடம் சுட்டிக்காட்டியுள்ளனர்.

அதற்குத் தேவையான நடவடிக்கைகள் உடனடியாக எடுக்கப்படும் என ஜனாதிபதி தெரிவித்துள்ளார்.

இதனிடையே, சிறப்பு வருமானம் ஈட்டும் மருத்துவர்கள், வழக்கறிஞர்கள், உதவி வகுப்பு! ஆசிரியர்கள், மதுக்கடை உரிமையாளர்கள், எரிபொருள் நிரப்பு நிலைய  உரிமையாளர்கள் என ஐந்தாயிரத்துக்கும் மேற்பட்டோர் வருமான வரி செலுத்தாமல் இருப்பதாக அரசுக்கு புகார் அளித்துள்ளனர்.

இவர்களிடம் இருந்து முறையாக வரிப்பணம் வசூலிப்பது குறித்தும் அரசு சிறப்பு கவனம் செலுத்தப்பட்டுள்ளது.