பொருளாதார நெருக்கடி, இலங்கை அடைந்த பல தசாப்தகால முன்னேற்றத்தை அழித்துள்ளது

இலங்கையில் வறுமையில் வாடும் குடும்பங்களுக்கு 100 ரூபாவாக இருந்த உணவு மற்றும் அத்தியாவசியப் பொருட்களை வாங்குவதற்கு 166 ரூபா செலவாகும் என மாலைதீவு, நேபாளம் மற்றும் இலங்கைக்கான உலக வங்கியின் பணிப்பாளர்  பாரிஸ் ஹடாத் கூறுகிறார்.

தெற்காசியாவில் வறுமை ஒழிப்பு தொடர்பில் உலக வங்கி வலைப்பதிவில் வெளியிடப்பட்டுள்ள “காத்திருப்பதற்கான திறன் இலங்கையின் பலம் நிச்சயமற்ற எதிர்காலத்தை வழிநடத்தும்” என்ற தலைப்பில் வெளியிடப்பட்டுள்ள கட்டுரையிலேயே அவர் இதனைக் குறிப்பிட்டுள்ளார்.

பொருளாதாரம் காரணமாக இலங்கையர்கள் வேலையிழந்துள்ளதாகவும் தொழிலாளர் சம்பளமும் குறைந்துள்ளதாகவும் கட்டுரையில் குறிப்பிடப்பட்டுள்ளது.

2021 மற்றும் 2022 க்கு இடையில் தொழில் மற்றும் சேவைத் துறையில் 5 லட்சம் வேலைகள் இழக்கப்பட்டுள்ளதாக உலக வங்கி மதிப்பிட்டுள்ளது என்றும் கட்டுரை கூறுகிறது.

இன்னும் தொழில் மற்றும் சேவைகளில் பணிபுரிபவர்கள் வருமானத்தில் 15 சதவீதம் குறைப்பை அனுபவிப்பார்கள் என்று எதிர்பார்க்கப்படுகிறது என கட்டுரையில் குறிப்பிட்டுள்ளார்.

கோவிட் தொற்றுநோய் மற்றும் சமீபத்திய பொருளாதார நெருக்கடி நாட்டை குழப்பத்தில் தள்ளும் வரை இலங்கை தீவிர வறுமையை ஒழிக்கும் பாதையில் இருந்தது, மேலும் 2006 முதல் 2016 வரை இலங்கையில் ஒரு நாளைக்கு 2.15 அமெரிக்க டொலருக்கும் குறைவான வருமானத்தில் வாழும் மக்களின் சதவீதம். இது 11ல் இருந்து 1.3 சதவீதமாகக் குறைந்துள்ளதாகவும், 20 லட்சம் பேர் கடும் வறுமையில் இருந்து விடுவிக்கப்பட்டதாகவும் திரு.ஹடாத் கூறினார்.

தமது தேவைகளை எவ்வாறு பூர்த்தி செய்வது என்ற சவாலை இலங்கையர்கள் தற்போது எதிர்நோக்கி வருகின்றனர்.

இலங்கையில் ஏற்பட்டுள்ள பொருளாதார நெருக்கடியானது தீவிர வறுமையை ஒழிப்பதில் இலங்கை அடைந்த பல தசாப்தகால முன்னேற்றத்தை அழித்துள்ளதாகவும்  சுட்டிக்காட்டியுள்ளார்.

2009 ஆம் ஆண்டிலிருந்து பதிவு செய்யப்பட்ட மிக உயர்ந்த வறுமை விகிதத்தை இலங்கை அனுபவித்து வருவதாகவும் ஹடாட் குறிப்பிட்டுள்ளார்.

கடந்த ஆண்டுக்கும் இந்த ஆண்டுக்கும் இடையில், ஏறத்தாழ 27 லட்சம் பேர் கூடுதலாக வறுமையில் வாடியுள்ளனர் என்றும், 80 சதவீதம் பேர் கிராமப்புறங்களில் வாழ்கின்றனர் என்றும், நகர்ப்புற வறுமை விகிதம் 15 சதவீதமாக மூன்று மடங்காக உயர்ந்துள்ளது என்றும் ஹடாத்  சுட்டிக்காட்டினார்.