‘மாமன்னன்’ திரைப்படம் தெலுங்கிலும் வெளியாக இருக்கிறது!

இயக்குநர் மாரி செல்வராஜ் இயக்கத்தில் நடிகர்கள் உதயநிதி, கீர்த்தி சுரேஷ் உள்ளிட்டப் பலர் நடித்து வெளியாகியுள்ள திரைப்படம் ’மாமன்னன்’. படம் வெளியாகி விமர்சன ரீதியாகவும், வசூல் ரீதியாகவும் நல்ல வரவேற்பைப் பெற்று வருகிறது. படம் குறித்தான பல விவாதங்களும் எழுந்துள்ள நிலையில், நடிகர் ரஜினிகாந்த்தும் ‘மாமன்னன்’ திரைப்படத்தைப் பார்த்து விட்டு இயக்குநர் மாரி செல்வராஜை பாராட்டியுள்ளார். மேலும், படத்தின் வெற்றிக்காக நடிகர் உதயநிதி ஸ்டாலின் இயக்குநர் மாரி செல்வராஜூக்கு 80 லட்ச ரூபாய் மதிப்பிலான காரும் பரிசளித்தார்.

தமிழில் கிடைத்து வரும் வரவேற்பைத் தொடர்ந்து இந்தத் திரைப்படம் தெலுங்கிலும் இந்த மாதம் 14-ம் தேதி வெளியாக இருப்பதைப் படக்குழு மகிழ்ச்சியுடன் தெரிவித்துள்ளது. தெலுங்கில் ‘நாயகுடு’ எனத் தலைப்பிடப்பட்டிருப்பதாகவும், தமிழைப் போலவே தெலுங்கிலும் நல்ல வரவேற்பைப் பெறும் எனவும் படக்குழு நம்பிக்கைத் தெரிவித்துள்ளனர். படம் வெளியாகி ஒரு வாரம் கடந்துள்ள நிலையில், இதுவரை பாக்ஸ் ஆபிசில் 40 கோடி ரூபாய் வரை வசூல் செய்துள்ளது என்பது குறிப்பிடத்தக்கது.