25 வயதில் எப்படி வாழ்ந்தால் 80 வயது வரை இதய நோயின்றி வாழலாம்?

உலகில் மாரடைப்பு வருவதற்கான வாய்ப்பு 50-100 சதவீதம் அதிகம். அதிலும் சமீபத்தில் இளம் வயதில் மாரடைப்பு விகிதம் அதிகரிப்பதில் இருந்தே நம்மால் புரிந்து கொள்ள முடியும்.

 இளம் வயது மாரடைப்பு மரணங்கள் அதிகரித்து வரும் வேளையில் 20 வயதிலிருந்தே உங்களுடைய வாழ்க்கை முறையில் சில மாற்றங்களைச் செய்வதன் மூலம் வயதான காலம் வரை இதய நோய் ஆபத்தைத் தவிர்க்க முடியும்.

உடற்பயிற்சி

 இதய நோய் ஆபத்தைக் குறைக்க உடற்பயிற்சி மிக முக்கியம் . இதயத்தை ஒவ்வொரு வாரமும் குறைந்தபட்சம் 150 நிமிடங்களாவது, உடற்பயிற்சி செய்ய வேண்டும். ஒரு நாளைக்கு குறைந்தபட்சம் 10000 ஸ்டெப்ஸ் நடைப்பயிற்சி செய்ய வேண்டியது அவசியம்.

 உடல் ரீதியாக சுறுசுறுப்பாக இருப்பது இதய ஆரோக்கியத்துக்கு மட்டுமின்றி ரத்த அழுத்தத்தைக் குறைக்கிறது. இரத்த சர்க்கரை அளவையும் கொலஸ்டிராலையும் கட்டுக்குள் வைத்திருக்க உதவி செய்யும்.

உணவு 

ஆரோக்கியமான, சமச்சீர் உணவுமுறையை சிறு வயது முதலே எடுத்துக் கொள்வது உங்களுடைய இதயத்தை ஆரோக்கியமாகப் பாதுகாக்க உதவி செய்யும்.

 தினமும் சுமார் 400 கிராம் பழங்கள் மற்றும் காய்கறிகளை எடுத்துக் கொள்ளும் பழக்கத்தைக் கொண்டிருக்க வேண்டும். முழு தானியங்கள், சிறுதானியங்கள், தாவர அடிப்படையிலான புரதங்கள், மீன் மற்றும் மெலிந்த புரதங்கள் ஆகியவற்றை உணவாக எடுத்துக் கொள்வது சிறந்தது.

 சர்க்கரை, உப்பு, பதப்படுத்தப்பட்ட உணவுகள், கொழுப்பு உணவுகள் ஆகியவற்றைக் கட்டுப்படுத்துவது நல்லது.

உடல் எடை

 இதயத்தை ஆரோக்கியமாக வைத்துக் கொள்ள வேண்டுமென்றால் அதற்கு உடல் எடையையும் கட்டுப்பாட்டுக்குள் வைத்திருக்க வேண்டும். இடுப்பு பகுதியில் கொழுப்பு சேர்க்கை அதிகமாகி, இடுப்புச் சுற்றளவு அதிகமாகி இருக்கிறது என்றால் அது உடல் வளர்சிதை மாற்றத்தினால் ஏற்படும் நோய்களின் ஆரம்ப கால அறிகுறி என்று பொருள்.

 இந்தியாவில் மாரடைப்பு உள்ளிட்ட இதய நோய்கள் ஏற்படுவதற்கான காரணங்களில் முக்கியமானது இந்த உடல் பருமன் பிரச்சினை.

புகைத்தல்

 உங்களுக்குப் புகைப்பிடிக்கும் பழக்கம் இருந்தால் முதலில் அதை நிறுத்துவதற்கான வேலையைப் பாருங்கள். கார்டியோ வாஸ்குலர் நோய்கள், நீரிழிவு, ரத்த அழுத்தம் உள்ளிட்ட எல்லா வகை பிரச்சினைகளுக்கும் முக்கியமான காரணியாக இந்த புகைப்பழக்கம் இருக்கிறது.

 மற்றவர்களை விட புகைப்பிடிக்கும் பழக்கம் உள்ளவர்களுக்கு மாரடைப்பு உண்டாகும் வாய்ப்பு இரண்டு முதல் மூன்று மடங்கு அதிகம்.

மது 

மதுவை மிதமான அளவில் எடுத்துக் கொள்வது பெரிய அளவில் பாதிப்புகளை ஏற்படுத்தா. ஒயின் போன்றவை உடலுக்கு நன்மை பயக்கக்கூடியவை என்று சொல்லப்பட்டு வந்தது.

 ஆனால் இந்தியர்களைப் பொருத்தவரையில் மது அருந்துவது மிக அதிக தீங்கு விளைவிக்கக் கூடிய பிரச்சினையாக இருக்கிறது. அதனால் மது அருந்துவதைத் தவிர்ப்பது இதய ஆரோக்கியத்துக்கு நல்லது.

இரத்த அழுத்தம்

 இதயத்தைப் பாதுகாப்பதில் ரத்த அழுத்தத்திற்கு மிக முக்கியமான பங்கு உண்டு. இதயத்தை ஆரோக்கியமாக வைத்திருக்க வேண்டுமென்றால் ரத்த அழுத்தத்தைச் சீராக வைத்திருக்க வேண்டியது முக்கியம். 

 இந்தியர்களில் நான்கில் ஒருவருக்கு ரத்த அழுத்தத்தின் அளவு, 140/90 mmHg க்கு மேல் உள்ளது.. ஆனால் ரத்த அழுத்தம் 120 mg க்கும் குறைவாகவும் மற்றும் 80 mmHg இன் குறைவாக ரத்த அழுத்தத்தை வைத்திருக்க வேண்டியது முக்கியம். 140/90 mmHg க்கு மேல் தொடர்ந்து இரத்த அழுத்தம் உள்ளவர்கள் கட்டாயம் அதை கட்டுப்படுத்த சிகிச்சை எடுத்துக் கொள்ள வேண்டும். 

நீரிழிவு

உலகத்திலேயே நீரிழிவால் பாதிக்கப்படுவதில் இந்தியா தான் முதல் இடத்தில் இருக்கிறது. இதுவே இதய ஆரோக்கியத்துக்கு முதல் சிக்கல் என்பதை புரிந்து கொள்ளுங்கள்.

 20 வயதை தாண்டிவிட்டாலே ரத்த சர்க்கரை அளவை சீராக வைத்துக் கொள்வதற்கான முயற்சிகளை மேற்கொள்ளுங்கள்.

 அடிக்கடி காலை வெறும் வயிற்று சர்க்கரை அளவையும் HbA1C அளவையும் பரிசோதிக்க வேண்டியது அவசியம். காலை வெறும் வயிற்றிவ் ரத்த சர்க்கரை 100 mg/dl க்கும் குறைவாகவும், உணவுக்குப் பின் 140 mg/dl க்கும் குறைவாகவும் இருக்க வேண்டும். HbA1c, 5.7 சதவீதம் முதல் 7 -குள் இருக்க வேண்டும்.