2024 ஜனாதிபதி தேர்தல் : வாக்குச் சீட்டு விநியோகம் தொடர்பில் வெளியான அறிவிப்பு!

2024ஆம் ஆண்டு ஜனாதிபதித் தேர்தலுக்கான உத்தியோகபூர்வ வாக்குச் சீட்டு விநியோகம் எதிர்வரும் செப்டெம்பர் மாதம் 3ஆம் திகதி ஆரம்பிக்கப்படும் என பிரதி தபால் மா அதிபர் ராஜித ரணசிங்க தெரிவித்துள்ளார்.  

அதற்கமைய எதிர்வரும் செப்டம்பர் மாதம் 8ஆம் திகதி விசேட தினமாக அறிவிக்கப்பட்டுள்ளதாக அவர் தெரிவித்துள்ளார்.

 விடுமுறை தினமான ஞாயிற்றுக்கிழமை காலை 08 மணி முதல் மாலை 06 மணி வரை இந்த விநியோகம் இடம்பெறும் என அவர் தெரிவித்தார். 

அன்றைய தினம் வீட்டிலேயே தங்கி அதனைப் பெற்றுக்கொள்ளுமாறு அவர் மக்களிடம் கேட்டுக்கொண்டார். செப்டம்பர் 14ஆம் திகதியுடன் வீடு வீடாகச் சென்று அதிகாரப்பூர்வ வாக்காளர் நோட்டீஸ் விநியோகம் முடிவடையும் என்றும், அதன் பிறகு வீடு வீடாகச் சென்று வாக்காளர் நோட்டீஸ் விநியோகம் செய்யப்பட மாட்டாது என்றும் தேர்தல் ஆணையம் தெரிவித்துள்ளது.  

எவ்வாறாயினும், தேர்தல் நாள் வரை, சாதாரண நேரங்களில் கடிதங்களைப் பெறும் தபால் நிலையத்திற்குச் சென்று தனது அடையாளத்தை உறுதிப்படுத்தி, தனது கையொப்பத்தைப் பயன்படுத்தி வாக்காளர் அறிவிப்புகளைப் பெற முடியும் என்று அவர் மேலும் கூறினார்.  

2024 ஆம் ஆண்டு ஜனாதிபதித் தேர்தல் செப்டம்பர் 21 ஆம் திகதி நடைபெறவுள்ளது. இதில் 39 பேர் விண்ணப்பித்துள்ளனர். இந்த ஜனாதிபதித் தேர்தலில் வாக்களிக்கத் தகுதி பெற்ற வாக்காளர்களின் எண்ணிக்கை 17,140,280 ஆகும். அவர்களில் 1,148,258 பேர் புதிய வாக்காளர்களாகும்.