1,500 மீன்பிடிப் படகுகளுக்குக் கப்பல் கண்காணிப்பு அமைப்புகளை நிறுவுவதை கட்டாயமாக்க அமைச்சரவை ஒப்புதல்!
இலங்கை கடற்பரப்பில் இயங்கும் சுமார் 1,500 மீன்பிடிப் படகுகளுக்குக் கப்பல் கண்காணிப்பு அமைப்புகளை (VMS) நிறுவுவதைக் கட்டாயமாக்கும் முன்மொழிவுக்கு அமைச்சரவை ஒப்புதல் அளித்துள்ளது.
மீன்பிடி படகை பயன்படுத்தி மேற்கொள்ளும் சட்டவிரோத செயல்கள் பிறநாடுகளில் உள்ள மீனவர்களுக்கும் சவாலாக உள்ளதாக சுட்டிக்காட்டப்பட்டுள்ளதன் அதனை தடுக்கும் ஒரு முயற்சியாக இந்த நடவடிக்கை மேற்கொள்ளப்படவுள்ளது.
இலங்கை, இந்தியப் பெருங்கடல் சூரை மீன் ஆணைக்குழுவில் (IOTC) உறுப்பினராக உள்ளது.
ஆணைக்குழுவின் விதிமுறைகளின்படி, சர்வதேச கடற்பரப்பில் இயங்கும் ஒவ்வொரு மீன்பிடிப் படகும் கப்பல் கண்காணிப்பு அமைப்பு (VMS) மூலம் தொடர்ச்சியாகக் கண்காணிக்கப்பட வேண்டும்.
தற்போது, பதிவுசெய்யப்பட்ட 5,200 பலநாள் மீன்பிடிப் படகுகளில், 4,200 படகுகளில் ஆஸ்திரேலிய அரசாங்கத்தின் மானியத்தின் கீழ் வழங்கப்பட்ட VMS கருவிகள் பொருத்தப்பட்டுள்ளன.
ஜனவரி 1, 2021 அன்று அல்லது அதற்குப் பிறகு பதிவுசெய்யப்பட்ட அனைத்து பல நாள் மீன்பிடிப் படகுகளுக்கும் இந்தக் கண்காணிப்பு அமைப்புகளை நிறுவுவது கட்டாயமாக்கப்பட்டுள்ளதால், அத்தகைய படகுகளின் உரிமையாளர்கள் அந்த உபகரணங்களைத் தங்கள் சொந்தச் செலவில் வாங்கி நிறுவ வேண்டும் என்று அரசாங்கத் தகவல் திணைக்களம் வெளியிட்டுள்ள அறிக்கையில் தெரிவிக்கப்பட்டுள்ளது.
ஜனவரி 1, 2021-க்கு முன்பு பதிவுசெய்யப்பட்ட சுமார் 1,500 பல நாள் மற்றும் ஒரு நாள் மீன்பிடிப் படகுகள் உள்ளன. இவை முக்கியமாக உள்நாட்டு நீர்நிலைகளில் இயங்குகின்றன, இருப்பினும் சில சர்வதேச நீர்நிலைகளிலும் இயங்குகின்றன.
இவற்றில், 34 அடிக்கு மேல் நீளம் கொண்ட சுமார் 400 படகுகள் சர்வதேச நீர்நிலைகளில் இயங்குவதற்கோ அல்லது பிற நடவடிக்கைகளுக்குப் பயன்படுத்துவதற்கோ தகுதியானவை. மீதமுள்ள 1,100 படகுகளுக்கு நீண்ட காலத்திற்கு கடலில் தங்குவதற்குத் தேவையான இயந்திர சக்தி அல்லது எரிபொருள் கொள்ளளவு இல்லை.
அதன்படி, இந்த 1,500 படகுகளுக்கும் பொருத்தமான படகு கண்காணிப்பு அமைப்புகளை நிறுவுவதைக் கட்டாயமாக்குவதற்கும், அதனுடன் தொடர்புடைய செலவுகளை அரசாங்கம் ஏற்கும் வகையிலும், மீன்வளம், நீர்வாழ் மற்றும் கடல் வளங்கள் அமைச்சர் சமர்ப்பித்த முன்மொழிவுக்கு அமைச்சரவை ஒப்புதல் அளித்துள்ளது.
இச்செய்திக்கு பிரதான அனுசரணை
வீடியோ இங்கே
