2027-ஆம் ஆண்டில் மூலதனச் செலவீனத்திற்காக 02 டிரில்லியன் ஒதுக்கீடு - ஜனாதிபதி யோசனை!!

அரசாங்கத்தின் தொடர் செலவினங்களைக் குறைத்து, அபிவிருத்திக்கான முதலீட்டை அதிகரிக்க வேண்டியதன் அவசியத்தை ஜனாதிபதி அனுர குமார திசாநாயக்க வலியுறுத்தியுள்ளார். மேலும், அரசாங்க நடவடிக்கைகளைப் பராமரிப்பதை விட, நாட்டின் முன்னேற்றத்திற்காக பொது வளங்கள் பயன்படுத்தப்பட வேண்டும் என்றும் அவர் கூறியுள்ளார்.

காலி மாவட்ட செயலகத்தில் நேற்று (28) நடைபெற்ற   சிறப்பு ஒருங்கிணைப்புக் குழு கூட்டத்தில் பங்கேற்றபோது ஜனாதிபதி இந்தக் கருத்துக்களைத் தெரிவித்தார்.

தற்போது 9 சதவீதமாக   உள்ள தொடர் செலவினங்களைக் குறைத்து, அபிவிருத்தி முதலீட்டை அதிகரிக்கும் நோக்கில், தற்போது 4 சதவீதமாக  உள்ள மூலதனச் செலவினத்தை அதிகரிக்கும் நோக்குடன், வரும் ஆண்டிற்கான அரசாங்கத்தின் பொருளாதாரத் திட்டங்கள் தயாரிக்கப்பட்டுள்ளதாகவும்  அவர் கூறினார்.

2027-ஆம் ஆண்டில் மூலதனச் செலவினத்திற்காக ரூ. 2 டிரில்லியன் ஒதுக்கீடு செய்ய திட்டங்கள் வகுக்கப்பட்டுள்ளன என்றும், இது ஏறக்குறைய 40% அதிகரிப்பைக் குறிக்கிறது என்றும் ஜனாதிபதியின் ஊடகப் பிரிவு ஓர் அறிக்கையில் தெரிவித்துள்ளது.

பொறுப்பான நிதி நிர்வாகத்தின் முக்கியத்துவத்தை வலியுறுத்திய ஜனாதிபதி, எதிர்கால சந்ததியினர் கடன் திருப்பிச் செலுத்தும் சுமையால் பாதிக்கப்படாத, நிதி ஒழுக்கமுள்ள ஒரு நாட்டை உருவாக்கும் நோக்கத்தில், திறைசேரிக்குக் கிடைக்கும் ஒவ்வொரு ரூபாயும் தேசிய அபிவிருத்திக்காக திறம்பட பயன்படுத்தப்பட வேண்டும் என்று கூறினார். 

 பொருளாதார செயல்திறன் மற்றும் சமூகக் குறிகாட்டிகள் தொடர்பான சர்வதேச மதிப்பீடுகளில் இலங்கை நேர்மறையான முன்னேற்றத்தைக் காட்டியுள்ளது என்றும், பொருளாதார ஸ்திரத்தன்மை மற்றும் ஊழலைக் குறைத்தல் போன்ற துறைகளில் ஏற்பட்ட முன்னேற்றங்களுக்காக அங்கீகாரம் பெற்றுள்ளது என்றும் சுட்டிக்காட்டியுள்ளர். 

மேலும்  வரவிருக்கும் நிதிநிலை அறிக்கை, டிஜிட்டல்மயமாக்கல் மூலம் பொதுத்துறை செயல்திறனை மேம்படுத்துவதற்கும், குடிமக்கள் அரசாங்க சேவைகளை தொலைவிலிருந்து அணுகுவதற்கும் சிறப்பு கவனம் செலுத்தும் என்று ஜனாதிபதி கூறினார். 

 பொது சேவையில் அனுபவம் வாய்ந்த மற்றும் திறமையான நிபுணர்களைத் தக்கவைத்துக் கொள்வதற்காக, தேர்ந்தெடுக்கப்பட்ட சில துறைகளில் ஓய்வு பெறும் வயதை நீட்டிப்பது குறித்து அரசாங்கம் பரிசீலித்து வருவதாகவும் அவர் மேலும் கூறினார். 

இச்செய்திக்கு பிரதான அனுசரணை

வீடியோ இங்கே