இலங்கை பொலிஸ் சேவையில் புதிதாக 10,000 பேர் இணைக்க திட்டம்!

இலங்கை பொலிஸ் திணைக்களத்தின் தற்போதைய செயல்பாடுகளுக்கு 102,000 அதிகாரிகள் தேவைப்படுகின்றனர். இருப்பினும், தற்போது 72,000 பேர் மட்டுமே பணியில் உள்ளனர்.

இந்த எண்ணிக்கையிலும் கூட, சுமார் 4,000 அதிகாரிகள் மருத்துவ விடுமுறையில் இருக்கின்றனர். இதன் காரணமாக, 102,000 பேர் செய்ய வேண்டிய பணிகளை, எஞ்சியிருக்கும் வெறும் 68,000 அதிகாரிகளே செய்ய வேண்டிய கட்டாயத்திற்கு தள்ளப்பட்டுள்ளனர்.

அளவுக்கு அதிகமான பணிச்சுமை காரணமாக பொலிஸ் அதிகாரிகள் கடுமையான சவால்களை எதிர்கொள்கின்றனர்.

கடந்த வருடம் மட்டும் கடமையின் போது ஏற்பட்ட பல்வேறு காரணங்களால் 1,100 பொலிஸ் அதிகாரிகள் உயிரிழந்துள்ளனர்.

தற்போதைய சூழலில் அதிகாரிகள் தங்களின் பணியை நிறைவேற்ற ஒரு நாளைக்கு 18 முதல் 20 மணித்தியாலங்கள் வரை ஓய்வின்றி தொடர்ச்சியாக கடமையாற்றி வருகின்றனர்.

இந்தப் பற்றாக்குறையையும் பணிச்சுமையையும் போக்கும் பொருட்டு, பொலிஸ் சேவையில் புதிதாக 10,000 பேரை இணைப்பதற்கான நடவடிக்கைகள் மேற்கொள்ளப்படும்.

மேலும், காலத்திற்குப் பொருத்தமான வகையில் அவர்களின் சீருடைகளில் மாற்றங்கள் ஏற்படுத்தப்படும். பொலிஸ் துறையினரின் பாதுகாப்பையும், பணியின் துல்லியத்தன்மையையும் மேம்படுத்த நவீன தொழில்நுட்ப உபகரணங்களை வழங்கவும் அரசு உறுதியான நடவடிக்கைகள் எடுக்கும் என்று அநுர குமார திசாநாயக்க தெரிவித்துள்ளார்.