நாசா வீரரையும் கவர்ந்த விஜய்யின் கை சைகை!
தமிழ்நாட்டின் சிவகங்கை மாவட்டம், காரைக்குடியில் அமைந்துள்ள தனியார் பாடசாலை ஒன்றில் நடைபெற்ற சிறப்பு நிகழ்வில், நாசாவின் முன்னாள் விண்வெளி வீரரான டொனால்ட் (டான்) தாமஸ் சிறப்பு விருந்தினராகக் கலந்துகொண்டு மாணவர்களுடன் கலந்துரையாடினார்.
விண்வெளிப் பயணம், அறிவியல், தொழில்நுட்பம் மற்றும் மாணவர்களின் எதிர்கால இலக்குகள் உள்ளிட்ட பல்வேறு விடயங்கள் தொடர்பில் அவர் தனது அனுபவங்களை மாணவர்களுடன் பகிர்ந்துகொண்டார்.
மாணவர்களும் அவரிடம் பல்வேறு கேள்விகளை எழுப்பி ஆர்வத்துடன் கலந்துரையாடினர்.
இதன்போது, நிகழ்வில் கலந்துகொண்ட காயம்பு இராமலிங்கம், விஜய் தொடர்பாக டான் தாமஸிடம் கேள்வி எழுப்பியதாக தெரிவிக்கப்படுகிறது.
அதற்குப் பதிலளித்த டான் தாமஸ், தான் விஜய்யின் தீவிர ரசிகர் எனக் கூறியதுடன், அவரைப் பாராட்டியும் கருத்து தெரிவித்ததாக கூறப்படுகிறது.
இதன் சிறப்பம்சமாக, விஜய்யுடன் தொடர்புபடுத்தி சமூக வலைத்தளங்களில் பிரபலமாகியுள்ள கை சைகையை டான் தாமஸ் மேடையிலேயே செய்து காட்டினார்.
அவரது இந்தச் செயல் அங்கு கூடியிருந்த மாணவர்கள் மற்றும் பார்வையாளர்களிடையே பெரும் உற்சாகத்தை ஏற்படுத்தியது.
ஒரு முன்னாள் நாசா விண்வெளி வீரர் விஜய் குறித்து பேசியதுடன், அவரது பிரபலமான கை சைகையையும் செய்து காட்டிய சம்பவம் அங்கிருந்தவர்களின் கவனத்தை வெகுவாக ஈர்த்தது.
இந்த நிகழ்வு தொடர்பான புகைப்படங்களும் காணொளிகளும் சமூக வலைத்தளங்களில் பகிரப்பட்டு கவனம் பெற்று வருகின்றன.
