இளம் வயதினரிடையே அதிகரிக்கும் இதய நோய் அபாயம் – எச்சரிக்கையாக இருக்க வேண்டியது அவசியம்

இளம் வயதிலேயே இதய நோய் ஏற்படுவது தற்போது கவலைக்குரிய சுகாதாரப் பிரச்சினையாக மாறி வருகிறது. வயது குறைவாக இருப்பதால் இதய நோய் ஏற்படாது என்ற எண்ணம் தவறானது. 

வாழ்க்கை முறை, உணவுப் பழக்கம், புகைப்பழக்கம், உடல் எடை மற்றும் மரபியல் காரணிகள் உள்ளிட்ட பல்வேறு காரணிகள் இதய நோய் ஏற்படும் அபாயத்தை அதிகரிக்கக்கூடும்.

சர்க்கரை நோய், உயர் இரத்த அழுத்தம், இரத்தத்தில் கொழுப்பின் அளவு அதிகரித்தல் மற்றும் குடும்பத்தில் இதய நோய் வரலாறு போன்றவை முக்கிய ஆபத்துக் காரணிகளாகக் கருதப்படுகின்றன. 

குறிப்பாக இளம் வயதிலேயே குடும்பத்தில் இதய நோய் ஏற்பட்டிருந்தால், தனிநபரின் அபாயம் அதிகரிக்கக்கூடும். அதேவேளை, நாள் முழுவதும் நீண்ட நேரம் அமர்ந்திருப்பது, போதிய உடற்பயிற்சி இல்லாமை, அதிக உப்பு, சர்க்கரை மற்றும் கொழுப்பு கொண்ட உணவுகளை தொடர்ந்து உட்கொள்வது, பழங்கள் மற்றும் காய்கறிகளை குறைவாக எடுத்துக்கொள்வது போன்ற பழக்கங்களும் இதய ஆரோக்கியத்தை பாதிக்கக்கூடும். 

புகைப்பழக்கம் இதய நோய் மற்றும் பக்கவாதத்திற்கான முக்கிய ஆபத்துக் காரணிகளில் ஒன்றாகும். இலங்கையிலும் உயர் இரத்த அழுத்தம் உள்ளிட்ட இதய நோய் ஆபத்துக் காரணிகள் குறித்து கவனம் செலுத்த வேண்டிய நிலை காணப்படுகிறது.

WHO இலங்கை அலுவலகத்தின் தகவலின்படி, இலங்கையில் 30 முதல் 70 வயதுக்குட்பட்ட பெரியவர்களில் சுமார் மூன்றில் ஒருவருக்கு உயர் இரத்த அழுத்தம் காணப்படுவதாகவும், அவர்களில் கணிசமானோர் தங்களுக்கு இந்நிலை இருப்பதை அறியாமல் இருப்பதாகவும் தெரிவிக்கப்பட்டுள்ளது. 

இதய நோயின் ஆரம்ப கட்டங்களில் வெளிப்படையான அறிகுறிகள் இல்லாமலும் இருக்கலாம். எனவே, குறிப்பாக உயர் இரத்த அழுத்தம், சர்க்கரை நோய், அதிகஅதிக கொழுப்பு, உடல் பருமன் அல்லது குடும்பத்தில் இதய நோய் வரலாறு உள்ளவர்கள் தங்களுடைய உடல்நிலையை அவ்வப்போது பரிசோதித்துக்கொள்வது முக்கியமானதாகும்.

நெஞ்சில் வலி அல்லது அழுத்தம், மூச்சுத்திணறல், வழக்கத்திற்கு மாறான சோர்வு, தலைச்சுற்றல், குளிர்ந்த வியர்வை, கை, தோள், தாடை அல்லது முதுகுப் பகுதியில் வலி போன்ற அறிகுறிகள் ஏற்பட்டால் அவற்றை அலட்சியப்படுத்தக்கூடாது. இவை மாரடைப்பின் அறிகுறிகளாக இருக்கக்கூடும். 

குறிப்பாக அறிகுறிகள் திடீரென ஏற்பட்டால் உடனடியாக அவசர மருத்துவ உதவியை நாட வேண்டும்.இதய நோய் அபாயத்தைக் குறைப்பதற்கு புகைப்பழக்கத்தை கைவிடுதல், உப்பு மற்றும் அதிக கொழுப்பு கொண்ட உணவுகளை குறைத்தல், பழங்கள் மற்றும் காய்கறிகளை அதிகமாக சேர்த்துக்கொள்ளுதல், வழக்கமான உடற்பயிற்சியில் ஈடுபடுதல், உடல் எடையை கட்டுப்பாட்டில் வைத்திருத்தல் மற்றும் இரத்த அழுத்தம், இரத்தச் சர்க்கரை மற்றும் கொழுப்பு அளவுகளை பரிசோதித்துக்கொள்ளுதல் போன்ற நடவடிக்கைகள் உதவக்கூடும்.

“இளம் வயது தானே, நமக்கு எதுவும் ஆகாது” என்ற அலட்சியத்தை விட, இதய ஆரோக்கியத்தில் முன்கூட்டியே கவனம் செலுத்துவது மிகவும் பாதுகாப்பானது

இச்செய்திக்கு பிரதான அனுசரணை

வீடியோ இங்கே