வெளிநாடுகளில் வசிக்கும் இலங்கை பிரஜைகளின் சாரதி அனுமதி பத்திரம் தொடர்பில் வெளியான முக்கிய செய்தி!
வெளிநாடுகளில் வசிக்கும் இலங்கை பிரஜைகள் தாயகத்திற்குத் திரும்பும்போது, மேலதிக அனுமதிகளைப் பெறாமலோ அல்லது தேவையற்ற கட்டணங்களைச் செலுத்தாமலோ, தற்போதைய இலங்கை சாரதி அனுமதிப் பத்திரங்களையே பயன்படுத்தலாம் என்று போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க தெரிவித்துள்ளார்.
நாடாளுமன்றத்தில் உரையாற்றிய இவ்வாறு குறிப்பிட்டுள்ளார்.
இதன்போது மேலும் கருத்து வெளியிட்ட அவர், ஏற்கனவே இலங்கையில் வழங்கப்பட்ட செல்லுபடியாகும் சாரதி அனுமதிப் பத்திரத்தைக் கொண்டுள்ள இலங்கையர்கள், தாயகத்திற்கு வருகை தரும் காலப்பகுதியில் சட்டப்பூர்வமாக வாகனங்களைச் செலுத்த முடியும் என்று தெரிவித்தார்.
வெளிநாடுகளில் சாரதி அனுமதிப் பத்திரங்களைப் பெறுவதற்காக, தமது இலங்கை சாரதி அனுமதிப் பத்திரங்களை அந்தந்த நாட்டு அதிகாரிகளிடம் ஒப்படைத்த இலங்கையர்களுக்கான நடைமுறை குறித்தும் அவர் விளக்கமளித்தார்.
அமைச்சரின் கூற்றுப்படி, இத்தகைய நபர்கள் தாயகத்திற்குத் திரும்பியதும், உரிய ஆவணங்களை அதிகாரிகளிடம் சமர்ப்பித்து, மீண்டும் இலங்கை சாரதி அனுமதிப் பத்திரத்தைப் பெற்றுக்கொள்ள முடியும்.
இதற்கிடையில், வெளிநாடுகளில் வசிக்கும் போது தமது இலங்கை சாரதி அனுமதிப் பத்திரங்களை இழந்த இலங்கையர்கள், பொலிஸ் முறைப்பாடு செய்தல் உள்ளிட்ட வழக்கமான நடைமுறைகளைப் பின்பற்றி, புதிய அனுமதிப் பத்திரங்களுக்கு விண்ணப்பிக்கலாம். பின்லாந்து மற்றும் குவைத் உள்ளிட்ட எந்தவொரு நாட்டிலிருந்தும் தாயகம் திரும்பும் இலங்கை பிரஜைகளுக்கும் இந்த ஏற்பாடுகள் பொருந்தும் என்று அமைச்சர் குறிப்பிட்டார்.
இலங்கை பிரஜைகள், தமது குடியுரிமை உரிமைகளின் அடிப்படையில், தேவையற்ற மேலதிக கட்டணங்கள் ஏதுமின்றி சாரதி அனுமதிப் பத்திர சேவைகளைப் பெறுவதற்கு உரித்துடையவர்கள் என்பதை அவர் வலியுறுத்தினார்.
வெளிநாடுகளில் வசிக்கும் இலங்கை பிரஜைகளுக்குப் பொருந்தும் நடைமுறைகள் குறித்த கவலைகளுக்குப் பதிலளிக்கும் வகையிலேயே, நாடாளுமன்றத்தில் இந்தத் தெளிவுபடுத்தல் வழங்கப்பட்டது.
