நகைக் கடை உரிமையாளரை தாக்கி துன்புறுத்திய பொலிஸ் அதிகாரிகள் - 30,0000 ரூபாய் இழப்பீடு வழங்க உத்தரவு!
நீர்கொழும்பு பிரிவு குற்றப் புலனாய்வுத் துறையைச் சேர்ந்த மூன்று பொலிஸ் அதிகாரிகள், குளியாப்பிட்டியவைச் சேர்ந்த நகை வியாபாரி ஒருவரை பொலிஸ் விசாரணையின் போது உடல் ரீதியாகத் தாக்கி, துன்புறுத்தி, சட்டவிரோதமாகத் தடுத்து வைத்ததன் மூலம் அவரது அடிப்படை உரிமைகளை மீறியுள்ளதாக உயர் நீதிமன்றம் தீர்ப்பளித்துள்ளது.
இந்த மூன்று அதிகாரிகளும் தலா 100,000 ரூபா வீதம், மொத்தம் 300,000 ரூபாவை அந்த வியாபாரிக்கு இழப்பீடாகத் தங்கள் சொந்தப் பணத்திலிருந்து வழங்க வேண்டும் என்று நீதிமன்றம் உத்தரவிட்டது.
நீதிபதிகள் ஏ.எல். ஷிரான் குணரத்ன, மஹிந்த சமாயவர்தன மற்றும் மேனகா விஜயசுந்தர ஆகியோர் அடங்கிய மூன்று நீதிபதிகள் கொண்ட அமர்வு இந்தத் தீர்ப்பை வழங்கியது.
குளியாப்பிட்டியவில் நகைக்கடை உரிமையாளரான சாஹுல் ஹமீது சஷேக் என்பவரே இந்த அடிப்படை உரிமை மீறல் மனுவைத் தாக்கல் செய்திருந்தார்.
தீர்ப்பின்படி, சந்தேக நபர் ஒருவரிடமிருந்து தான் அறியாமல் வாங்கிய தங்கம் தொடர்பான விசாரணையின் போது, பொலிஸ் அதிகாரிகள் தன்னைத் தாக்கி அச்சுறுத்தியதாக அந்த வியாபாரி குற்றம் சாட்டியிருந்தார்.
தான் வீட்டில் இல்லாத நேரத்தில் அங்கு வந்த பொலிஸ் அதிகாரிகள், தான் உடனடியாகத் திரும்பி வராவிட்டால் தனது மனைவி மற்றும் குழந்தைகளைக் கைது செய்துவிடுவோம் என்று மிரட்டியதாக அவர் தெரிவித்தார்.
வீட்டிற்குத் திரும்பியதும், தன்னை விலங்கிட்டு, முழங்காலிடச் செய்து, தனது மனைவி மற்றும் குழந்தைகளின் முன்னிலையில் கொடூரமான முறையில் தாக்கியதாக அவர் குறிப்பிட்டார்.
மேலும், வாகனத்திற்குள் வைத்துத் தன்னைத் தொடர்ந்து தாக்கிய அதிகாரிகள், தங்கத்தையும் பணத்தையும் அவர்களிடம் ஒப்படைக்குமாறு கட்டாயப்படுத்தியதாகவும் அவர் கூறினார்.
மனுதாரரின் நகைக்கடையில் பொருத்தப்பட்டிருந்த சிசிடிவி (CCTV) கேமராக்களில், தங்கம் ஒப்படைக்கப்பட்ட சம்பவம் தொடர்பான காட்சிகள் பதிவாகியிருந்தன.
அத்துடன், அதிகாரிகள் தன்னை மது அருந்தக் கட்டாயப்படுத்தியதாகவும், இந்தத் தாக்குதல்கள் குறித்து மருத்துவ அதிகாரிகளிடமோ அல்லது நீதிமன்றத்திலோ முறைப்பாடு அளித்தால் விளைவுகள் மோசமாக இருக்கும் என்று மிரட்டியதாகவும் அவர் குற்றம் சாட்டினார்.
பொலிஸ் அதிகாரிகள் இந்தக் குற்றச்சாட்டுகளை மறுத்தனர். விசாரணையின் ஒரு பகுதியாகவே அந்த வியாபாரி சட்டப்பூர்வமாகக் கைது செய்யப்பட்டதாகவும், அவரிடமிருந்து தங்க நகைகளும் வெளிநாட்டு நாணயங்களும் மீட்கப்பட்டதாகவும் அவர்கள் வாதிட்டனர்.
இருப்பினும், மனுதாரர் சமர்ப்பித்த ஆதாரங்கள் அவரது குற்றச்சாட்டுகளை உறுதிப்படுத்துவதாகக் கருதிய உயர் நீதிமன்றம், பொலிஸ் அதிகாரிகளின் விளக்கங்களை நிராகரித்து மேற்படி தீர்ப்பளித்துள்ளது.
