ஆந்திராவில் மின்சார ரம்பம் மூலம் வகுப்பறையில் தாக்குதல் நடத்திய இளைஞர் சுட்டு பிடிப்பு
ஆந்திரப் பிரதேசத்தின் அனந்தபூரில், செயின்-சா (இயந்திர ரம்பம்) மூலம் மாணவியர் மீது தாக்குதல் நடத்திய 21 வயது ஹேமந்த், காவல்துறையினரின் துப்பாக்கிச் சூட்டில் பலத்த காயமடைந்து, உயிர் பிழைக்கப் போராடி வருகிறார்.
ஹேமந்த் கைது செய்யப்படுவதை எதிர்த்து, கத்தியால் காவல்துறை குழுவினர் மீது தாக்குதல் நடத்தியதாகவும், அதில் ஒரு சர்க்கிள் இன்ஸ்பெக்டர் காயமடைந்ததாகவும் கூறப்படுகிறது.
இதனைத் தொடர்ந்து காவல்துறையினர் சுமார் ஆறு முறை துப்பாக்கியால் சுட்டனர். இந்தச் சம்பவத்தில் ஹேமந்தின் கால்களில் நிரந்தர பாதிப்பு ஏற்பட்டுள்ளதால், ஒரு காலை இழக்க வேண்டிய சூழல் உருவாகலாம் என்று அஞ்சப்படுகிறது; இருப்பினும், இது குறித்து மருத்துவர்கள் இன்னும் உறுதிப்படுத்தவில்லை.
அக்டோபர் 31 அன்று, அனந்தபூர் மாவட்டத்தில் ஹேமந்த், பத்தாம் வகுப்பு பயிலும் இரு மாணவியர் மீது செயின்-சாவைக் கொண்டு தாக்குதல் நடத்தினார்.
இந்தத் தாக்குதலில் படுகாயமடைந்த 15 வயது சிறுமி ஒருவர், தனது வலது கையை இழந்துள்ளார். அவளது முகம், கழுத்து மற்றும் உடலின் பிற பகுதிகளில் கடுமையான காயங்களும், பல எலும்பு முறிவுகளும் ஏற்பட்டுள்ளன. தனது தோழியைப் காப்பாற்ற முயன்றபோது காயமடைந்த மற்றொரு மாணவிக்கும் உரிய மருத்துவ சிகிச்சைகள் அளிக்கப்பட்டுள்ளன.
