வங்கதேசத்தில் காணாமல் போன இந்திய மாணவர் கல்லூரிக்கு அருகிலுள்ள குளத்தில் சடலமாக மீட்பு

ஜம்மு-காஷ்மீரைச் சேர்ந்த 26 வயது மருத்துவ மாணவர் ஒருவர், வங்கதேசத்தின் குமிலா மாவட்டத்தில் உள்ள தனது கல்லூரி வளாகத்திலிருந்து மாயமான இரண்டு நாட்களுக்குப் பிறகு சடலமாக மீட்கப்பட்டார்.

புரிச்சாங் உபஜிலாவில் உள்ள ஈஸ்டர்ன் மருத்துவக் கல்லூரியில் பயின்று வந்த அட்னான் அல்தாஃப், உணவு உண்பதற்காக இந்திய உணவகம் ஒன்றிற்குச் சென்றபோது மாயமானதாகக் கூறப்படுகிறது.

இந்நிலையில், டாக்கா-சிட்டகாங் நெடுஞ்சாலைக்கு அருகில் அமைந்துள்ள அவரது கல்லூரிக்கு மிக அருகிலுள்ள மோனிபூர் கிராமத்தில் இருந்த நீர்நிலை ஒன்றிலிருந்து அவரது உடல் கண்டெடுக்கப்பட்டது.

வட காஷ்மீரின் சோபோர் பகுதியைச் சேர்ந்தவர் அட்னான். அவரது மரணம் குடும்பத்தினரை மிகுந்த துயரத்தில் ஆழ்த்தியுள்ளது. 

அவரது உறவினர்கள், இந்திய அரசு இதில் தலையிட்டு, அவரது உடலை மீண்டும் சொந்த ஊருக்குக் கொண்டு வர உதவ வேண்டும் என்று கோரிக்கை விடுத்துள்ளனர்.