மலையக மக்களின் பிரச்சினைகள் புறக்கணிப்பு – மனோ கணேசன் அதிருப்தி!

2027ஆம் ஆண்டுக்கான வரவு செலவுத் திட்டத்தில் பெருந்தோட்ட மக்களின் அடிப்படைப் பிரச்சினைகளுக்குப் போதிய கவனம் செலுத்தப்படவில்லை என தமிழ் முற்போக்குக் கூட்டணியின் தலைவரும் நாடாளுமன்ற உறுப்பினருமான மனோ கணேசன் அதிருப்தி வெளியிட்டுள்ளார்.

ஜனாதிபதி அநுர குமார திசாநாயக்க கடந்த 12ஆம் திகதி நாடாளுமன்றத்தில் சமர்ப்பித்த 2027ஆம் ஆண்டுக்கான வரவு செலவுத் திட்டம் தொடர்பில் ஊடகங்களுக்குக் கருத்துத் தெரிவிக்கும்போதே அவர் இவ்வாறு குறிப்பிட்டுள்ளார்.

குறித்த வரவு செலவுத் திட்டம் ஒட்டுமொத்தத்தில் வெறும் வெற்றுவேட்டு என விமர்சித்துள்ள மனோ கணேசன், ஜனாதிபதி நீண்ட உரையொன்றை நிகழ்த்தியிருந்தாலும், பெருந்தோட்ட மக்களின் அடிப்படைத் தேவைகள் தொடர்பில் உரிய கவனம் செலுத்தப்படவில்லை எனத் தெரிவித்துள்ளார்.

சம்பளக் கொடுப்பனவும் வாழ்க்கைச் செலவும்!

பெருந்தோட்டத் தொழிலாளர்களுக்கு வழங்கப்படும் தினசரி 200 ரூபாய் கொடுப்பனவைத் தொடர்ந்து வழங்குவதாக ஜனாதிபதி அறிவித்துள்ள போதிலும், மலையக மக்களின் வாழ்க்கைச் செலவுகள் பல மடங்கு அதிகரித்துள்ளமை கவனத்தில் கொள்ளப்படவில்லை என மனோ கணேசன் சுட்டிக்காட்டியுள்ளார்.

அதிகரித்து வரும் அன்றாட வாழ்க்கைச் செலவுகளுக்கு மத்தியில், குறித்த கொடுப்பனவு மாத்திரம் மக்களின் பொருளாதாரப் பிரச்சினைகளுக்குப் போதுமான தீர்வாக அமையாது எனவும் அவர் தெரிவித்துள்ளார்.

10,000 வீடமைப்புத் திட்டத்தின் முன்னேற்றம் குறித்து கேள்வி!

மலையக மக்களுக்கான வீடமைப்புத் திட்டத்தை விரைவுபடுத்துவதாக ஜனாதிபதி குறிப்பிட்டிருந்தாலும், 10,000 வீடமைப்புத் திட்டத்தின் கீழ் இதுவரையில் சுமார் 50 வீடுகள் மாத்திரமே நிர்மாணிக்கப்பட்டுள்ளதாக மனோ கணேசன் தெரிவித்துள்ளார்.

வீடமைப்புத் திட்டத்தின் முன்னேற்றம் மந்தகதியில் காணப்படுவதாகவும், பெருந்தோட்ட மக்களின் வீட்டுப் பிரச்சினைக்கு விரைவான தீர்வு வழங்கப்பட வேண்டும் எனவும் அவர் வலியுறுத்தியுள்ளார்.

ஜனாதிபதிக்கு அனுப்பிய கடிதம் கவனத்தில் கொள்ளப்படவில்லை! வரவு செலவுத் திட்டம் தொடர்பில் தாம் ஜனாதிபதிக்குக் கடிதமொன்றை அனுப்பியிருந்ததாகக் குறிப்பிட்ட மனோ கணேசன், அதில் முன்வைக்கப்பட்ட விடயங்கள் கவனத்தில் கொள்ளப்படவில்லை எனவும் குற்றஞ்சாட்டியுள்ளார்.

வரவு செலவுத் திட்டத்தை முன்வைக்கும் ஜனாதிபதி வெறுமனே கணக்குகளை வாசிப்பவராக மாத்திரம் இருக்கக்கூடாது எனத் தாம் ஏற்கனவே குறிப்பிட்டிருந்ததாகவும் அவர் தெரிவித்துள்ளார்.

மலையக மக்களின் சம்பளம், வாழ்க்கைச் செலவு மற்றும் வீடமைப்புப் பிரச்சினைகளுக்குத் தீர்வு காணும் வகையில் போதிய முன்மொழிவுகள் 2027ஆம் ஆண்டுக்கான வரவு செலவுத் திட்டத்தில் இடம்பெறவில்லை என்பதே மனோ கணேசனின் பிரதான விமர்சனமாக அமைந்துள்ளது.