சூப்பரான சேமியா பிரியாணி சமையுங்கள்

தேவையான பொருட்கள்:

• சேமியா – அரை கிலோ,
• பெரிய வெங்காயம் – கால் கிலோ,
• தக்காளி – 2,
• பச்சை மிளகாய் – 3,
• இஞ்சி பூண்டு பேஸ்ட் – 2 ஸ்பூன்,
• மிளகாய்தூள் – ஒன்றரை ஸ்பூன்,
• மஞ்சள் தூள் – அரை ஸ்பூன்,
• உப்பு – ஒரு ஸ்பூன்,
• புதினா – ஒரு கொத்து,
• கொத்தமல்லி – ஒரு கொத்து,
• எண்ணெய் – 4 ஸ்பூன்,
• பிரிஞ்சி இலை – ஒன்று,
• பட்டை – சிறிய துண்டு,
• ஏலக்காய் – 2,
• கிராம்பு – 2,
• அன்னாசிப்பூ – ஒன்று,
• ஜாதிபத்ரி – 1,
• சோம்பு – ஒரு ஸ்பூன்.

செய்முறை:

• முதலில் வெங்காயம், பச்சை மிளகாய் மற்றும் தக்காளியை நீளவாக்கில் அரிந்து வைத்துக் கொள்ள வேண்டும்.
• பின்னர் கொத்தமல்லி மற்றும் புதினா இலைகளை கிள்ளி கொண்டு நன்றாக நீரில் அலசி வைத்துக் கொள்ள வேண்டும்.
• அதன் பின் ஒரு கடாயில் சேமியாவை லேசாக வறுத்து வைத்துக்கொள்ள வேண்டும்.
• பின்னர் ஒரு கடாயை அடுப்பில் வைத்து எண்ணெய் ஊற்றி எண்ணெய் நன்றாக காய்ந்ததும் பிரிஞ்சி இலை, சோம்பு, பட்டை, ஏலக்காய், அன்னாசிப்பூ மற்றும் ஜாதிபத்ரி இவை அனைத்தையும் சேர்த்து தாளிக்க வேண்டும்.
• பிறகு நறுக்கி வைத்துள்ள வெங்காயம், பச்சை மிளகாய் சேர்த்து நன்றாக வதக்கிக் கொள்ள வேண்டும்.
• வெங்காயம் நன்றாக குழைந்து வருமாறு வதக்கிய பின்னர் இஞ்சி, பூண்டு விழுதை சேர்த்து பச்சை வாசனை போகும் வரை வதக்கிக் கொள்ள வேண்டும்.
• அதன் பின் தக்காளி புதினா கொத்தமல்லி போன்றவற்றை இவற்றுடன் சேர்த்து நன்றாக வதக்கிக் கொள்ள வேண்டும்.
• பிறகு மிளகாய்த்தூள், மஞ்சள் தூள் மற்றும் உப்பு சேர்த்து நன்றாக வதக்கிய பின்னர் 4 டம்ளர் தண்ணீர் ஊற்றி நன்றாக கொதிக்கவிட வேண்டும்.
• தண்ணீர் நன்றாக கொதித்த பின்னர் வறுத்து வைத்துள்ள சேமியாவை இதனுடன் சேர்த்து 5 நிமிடங்கள் கடாயை மூடி வைத்து அடுப்பை சிறிய தீயில் வைத்து வேக வைக்க வேண்டும்.
• 5 நிமிடங்கள் கழித்து மூடியை திறந்து ஒரு முறை கிளறி விட வேண்டும். அவ்வளவு தான்.
• சுவையான சேமியா பிரியாணி தயாராகி விட்டது. இவ்வாறு சேமியா வைத்து ஒருமுறை பிரியாணி செய்து வீட்டில் உள்ளவர்களுக்கு கொடுத்து பாருங்கள். மிகவும் விருப்பமாக சாப்பிடுவார்கள். பிரியாணி சாப்பிட வேண்டும் என்ற எண்ணம் இருந்தவர்களுக்கும் இதை சாப்பிட்டவுடன் மனது நிறைவாகி விடும்.