INDvsWI 2022 - 1000ஆவது ஒருநாள் போட்டியில் வெஸ்ட் இண்டீசை வீழ்த்தியது இந்தியா
இந்தியா-வெஸ்ட் இண்டீஸ் அணிகள் மோதும் முதல் ஒருநாள் போட்டி அகமதாபாத்தில் இன்று நடைபெற்றது. இதில் டாஸ் வென்ற இந்திய அணி பந்துவீச்சை தேர்வு செய்தது.
அதன்படி, முதலில் ஆடிய வெஸ்ட் இண்டீஸ் அணி 43.5 ஓவரில் 176 ரன்களுக்கு ஆல் அவுட்டானது. இந்திய அணியினரின் பந்துவீச்சில் வெஸ்ட் இண்டீஸ் அணி சிக்கியது. அந்த அணியில் ஜெசன் ஹோல்டர் அரை சதமடித்து 57 ரன்னில் அவுட்டானார்.
ஒரு கட்டத்தில் வெஸ்ட் இண்டீஸ் அணி 79 ரன்களுக்கு 7 விக்கெட்டுகளை இழந்து தடுமாறியது. அடுத்து இறங்கிய ஹோல்டர்- ஆலன் ஜோடி பொறுப்புடன் ஆடியது. இதனால் வெஸ்ட் இண்டீஸ் அணி 150 ரன்களை கடந்தது.
இந்தியா சார்பில் சாஹல் 4 விக்கெட்டும், வாஷிங்டன் சுந்தர் 3 விக்கெட்டும் பிரிசித் கிருஷ்ணா 2 விக்கெட்டும், சிராஜ் 1 விக்கெட்டும் வீழ்த்தினர்.
இதையடுத்து, 178 ரன்கள் எடுத்தால் வெற்றி என்ற இலக்குடன் இந்திய அணி களமிறங்கியது. தொடக்க ஆட்டக்காரர்களாக ரோகித் சர்மாவும், இஷான் கிஷணும் களமிறங்கினர்.
ஆரம்பம் முதல் ரோகித் சர்மா அதிரடியாக ஆடினார். இவர் அதிரடியாக ஆடி அரை சதமடித்தார். முதல் விக்கெட்டுக்கு 84 ரன்கள் சேர்த்த நிலையில் ரோகித் சர்மா 60 ரன்னில் அவுட்டானார்.
அடுத்து இறங்கிய விராட் கோலி 8 ரன்னிலும், இஷான் கிஷண் 29 ரன்னிலும், ரிஷப் பண்ட் 11 ரன்னிலும் அவுட்டாகினர்.
தொடர்ந்து இறங்கிய சூர்யகுமார் யாதவ், தீபக் ஹூடா ஜோடி மேற்கொண்டு விக்கெட் விழாமல் பார்த்துக் கொண்டது. இந்த ஜோடி பொறுப்புடன் ஆடி இந்திய அணியை வெற்றிப் பாதைக்கு அழைத்துச் சென்றது.
இறுதியில், இந்தியா 28 ஓவரில் 4 விக்கெட் இழப்புக்கு 178 ரன்கள் எடுத்து அபார வெற்றி பெற்றது. தீபக் ஹூடா 26 ரன்னும், சூர்யகுமார் யாதவ் 34 ரன்னுடனும் ஆட்டமிழக்காமல் உள்ளனர்.
