போலி கையொப்ப சர்ச்சை, விளக்கமளித்தது அஸ்கிரிய பீடம்

ஜனாதிபதி கோட்டாபய ராஜபக்சவிற்கு முப்பெரும் பீடாதிபதிகளினால் அனுப்பப்பட்ட கடிதத்தில் அஸ்கிரிய மகாநாயக்கர் கடந்த ஏப்ரல் மாதம் 20ஆம் திகதி தனது விருப்பத்திற்கிணங்க கையொப்பமிட்டுள்ளதாக அஸ்கிரிய பீடம் தெரிவித்துள்ளது.

அஸ்கிரிய பீடம் வெளியிட்டுள்ள அறிக்கையில், மகாநாயக்க தேரர்கள் கடிதத்தில் கையொப்பமிட்டது தொடர்பான ஊடக அறிக்கையை தெளிவுபடுத்தியுள்ளது.

இது தொடர்பாக அரச புலனாய்வுப் பிரிவின் தனிநபர் ஒருவரால் முறைப்பாடு அளிக்கப்பட்டுள்ளதாக அந்த அறிக்கையில் தெரிவிக்கப்பட்டுள்ளது. 

ஊடகங்களில் வெளியாகும் செய்திகள் குறித்து தலைமை பீடாதிபதியின் அலுவலகத்திடம் இருந்து விளக்கம் கோரப்படவில்லை என அந்த அறிக்கையில் மேலும் தெரிவிக்கப்பட்டுள்ளது.

அத்தகைய அறிக்கைகள் பரப்பப்படுவதையும், உரிய விசாரணைகள் இன்றி உரிமைகோரல்களை வெளியிடுவதையும் அந்த அறிக்கை கண்டிக்கிறது.

பிரதம பீடாதிபதிகள் ஜனாதிபதிக்கு அனுப்பிய கடிதத்தில் பொருளாதார மற்றும் அரசியல் நெருக்கடிகளுக்கு மத்தியில் முன்னோக்கி செல்வதற்கான ஆலோசனைகள் அடங்கியிருந்தன.

நாட்டில் நிலவும் அரசியல் மற்றும் பொருளாதார நெருக்கடிகளுக்கு தீர்வுகளையும் அது பரிந்துரைத்தது.