இலங்கையர்களுக்கான விசாவை நிறுத்தியதாக வெளியான தகவல்! இந்தியாவின் பதில்
இலங்கையில் உள்ள இந்திய உயர்ஸ்தானிகராலயம் இலங்கையர்களுக்கு விசா வழங்குவதை நிறுத்தியதா என்பது தொடர்பான பல்வேறு கேள்விகளுக்கு விளக்கம் அளித்துள்ளது.
இந்திய உயர் ஸ்தானிகராலயம் அல்லது இலங்கையில் உள்ள இந்திய துணை தூதரகம் அல்லது இந்திய உதவி உயர் ஸ்தானிகராலயம் விசா வழங்குவதை நிறுத்திவிட்டதாக திட்டவட்டமாக மறுத்துள்ளது.
டுவிட்டரில் வெளியிட்டுள்ள அறிக்கையில், உயர் ஸ்தானிகராலயம் கடந்த சில நாட்களாக, அதன் விசா பிரிவு ஊழியர்கள், அவர்களில் பெரும்பாலோர் இலங்கை பிரஜைகள், அலுவலகத்திற்குச் செல்ல முடியாததால், செயல்பாட்டுச் சிக்கல்கள் ஏற்பட்டதாகக் கூறியது.
எங்களது செயல்பாடுகளை விரைவில் இயல்பு நிலைக்கு கொண்டு வர முயற்சித்து வருகிறோம் என இந்திய உயர் ஸ்தானிகராலயம் மேலும் தெரிவித்துள்ளது.
இந்தியாவுக்கான இலங்கையர்களின் பயணத்தை எளிதாக்குவதற்கு தாம் அர்ப்பணிப்புடன் இருப்பதாகவும் இராஜதந்திர தூதரகம் உறுதியளித்துள்ளது.
“இந்தியர்கள் இலங்கையில் இருப்பதைப் போலவே இலங்கையர்களும் இந்தியாவில் வரவேற்கப்படுகிறார்கள்,” என்று உயர்ஸ்தானிகர் மேலும் கூறினார்.
இலங்கையர்களுக்கு விசா வழங்குவதை இந்தியா நிறுத்தியதா என பல சமூக ஊடக பயனர்கள் கேள்வி எழுப்பியதை அடுத்து இந்த விளக்கம் அளிக்கப்பட்டது.
