கடந்த மாதத்தில் பாதாள உலக குழுவினரால் 13 பேர் சுட்டுக்கொலை

கடந்த மாதத்தில் பாதாள உலக ஆயுதக் குழுக்களால் 13 பேர் சுட்டுக்கொல்லப்பட்டுள்ளதாக பொலிஸ் தலைமையக தகவல்கள் தெரிவிக்கின்றன.

பாதாள உலக ஒழிப்பு நடவடிக்கைகள் வலுவிழந்து காணப்படுவதும், பொலிஸாரை வேறு கடமைகளில் ஈடுபடுத்துவதும் இந்த பாதாள உலகக் கொலைகள் அதிகரிப்பதற்கு பிரதான காரணம் என அந்த வட்டாரங்கள் மேலும் தெரிவித்தன.

இந்த 13 கொலைகளில் 11 கொலைகள் மேல் மாகாணத்தில் நடந்துள்ளன.

போதைப்பொருள் கடத்தல் தகராறு காரணமாக இந்த கொலைகள் நடந்துள்ளதாகவும் போலீசார் தெரிவித்தனர்.

கடந்த மே 30 அன்று புறக் கோட்டை நகர மையத்தில் நடந்த தாக்குதலில் ஒருவர் கொல்லப்பட்டார்.

அதன் பின்னர் பாணந்துறை, பண்டாரகம, வத்தளை, கிரிபத்கொட, மொரட்டுவ, மோதர, கொலன்னாவ, வெலிகம மற்றும் தங்காலை பிரதேசங்களில் இடம்பெற்ற தாக்குதல்கள் இந்த கொலைகளில் விளைந்துள்ளன.

பாதாள உலகத்தை ஒடுக்குவதற்காக நியமிக்கப்பட்டுள்ள கொழும்பு, பேலியகொட, மிரிஹான மற்றும் களுத்துறை குற்றப் பிரிவுகளின் அதிகாரிகள் அரசியல்வாதிகளின் வீடுகளுக்கு எரிப்பு சம்பவம் தொடர்பில் விசாரணைகளை முன்னெடுத்தனர்.

மேலும், போராட்டங்களை ஒடுக்குவதற்கும், அரசியல்வாதிகளைப் பாதுகாப்பதற்கும் அதிகளவான பொலிஸ் உத்தியோகத்தர்கள் கடமையில் ஈடுபடுத்தப்பட்டுள்ளமையினால் பாதாள உலகத்தை ஒடுக்குவதற்கு பொலிஸ் உத்தியோகத்தர்களுக்கு பாரிய தட்டுப்பாடு ஏற்பட்டுள்ளதாக பொலிஸார் தெரிவிக்கின்றனர்.