இந்தியாவிற்கும் இலங்கைக்கும் இடையிலான மின் இணைப்பு தொடர்பில் இந்திய வெளிவிவகார அமைச்சர் பிரதமருடன் கலந்துரையாடல்

பிரதமர் தினேஷ் குணவர்தன மற்றும் இந்திய வெளிவிவகார அமைச்சர் சுப்ரமணியம் ஜெயசங்கர் ஆகியோருக்கிடையில் "இருதரப்பு உறவுகள், கூட்டுத் திட்டங்கள் மற்றும் இலங்கைக்கான இந்திய உதவிகள்"  என்ற தலைப்பில் கலந்துரையாடல் இன்று நடைபெற்றது.

இலங்கைக்கான உத்தேச சர்வதேச நாணய நிதியத்தின் (IMF) பொதிக்கு இந்தியா முழுமையாக ஆதரவளிக்கும் என்று சர்வதேச நாணய நிதியத்திற்கு இந்தியா உறுதியளித்தமைக்கு பிரதமர் தனது நன்றியைத் தெரிவித்தார்.

சர்வதேச நாணய நிதியம் இலங்கைக்கு 2.9 பில்லியன் அமெரிக்க டொலர் கடனை வழங்குவதற்காக கடன் வழங்கும் நாடுகளிடம் இருந்து அத்தகைய உத்தரவாதத்தை எதிர்பார்த்தது.

கடந்த ஆண்டு இலங்கையின் பொருளாதார நெருக்கடியின் தொடக்கத்தில் கடன் மறுசீரமைப்பிற்காக 4 பில்லியன் அமெரிக்க டாலர்களை இந்தியா வழங்கியதற்கும், நம்பகமான மற்றும் நெருங்கிய நண்பராக அதன் தொடர்ச்சியான உதவி மற்றும் ஆதரவிற்கும் பிரதமர் நன்றி தெரிவித்தார்.

“இந்தப் பொருளாதார நெருக்கடியிலிருந்து இலங்கை விரைவில் மீண்டுவிடும் என்று நாங்கள் நம்புகிறோம். எதிர்காலப் பணிகள் வெற்றியடைய அனைத்து வழிகளிலும் நாங்கள் உறுதுணையாக இருப்போம்” என்று பிரதமரிடம் அமைச்சர் ஜெயசங்கர் உறுதியளித்தார்.

சர்வதேச நாணய நிதியத்துடனான தற்போதைய பரிவர்த்தனைகள் மூலம் கூடுதல் நிதி வசதிகளை பெற்றுக் கொள்வதற்காக, மேலும் நிலையான நிதி முகாமைத்துவ பாதையில் இலங்கை பிரவேசிக்க முடியும் என இந்தியா நம்புவதாக இந்திய வெளிவிவகார அமைச்சர் தெரிவித்தார்.

இந்தியாவுக்கும் இலங்கைக்கும் இடையிலான உத்தேச மின் இணைப்பு தொடர்பில் கருத்து தெரிவித்த பிரதமர் குணவர்தன, புதுப்பிக்கத்தக்க எரிசக்தி துறையில் இந்தியா முதலீடு செய்ய வேண்டும் என்றார்.

"இலங்கையானது காற்று மற்றும் சூரிய ஒளி அதிகம் உள்ள நாடு, எனவே இது போன்ற புதுப்பிக்கத்தக்க எரிசக்தி திட்டங்களுக்கு அதிக வாய்ப்பு உள்ளது" என்று இந்திய வெளியுறவுத்துறை அமைச்சர் ஜெயசங்கர் தெரிவித்தார்.

இலங்கையிலுள்ள 4.2 மில்லியன் பாடசாலை மாணவர்களுக்கான 19 மில்லியன் பாடசாலை பாடப்புத்தகங்களை அச்சிடுவதற்கு இந்திய ஆதரவை வழங்கியமைக்கு கல்வி அமைச்சர் சுசில் பிரேமஜயந்த நன்றி தெரிவித்தார்.

இலங்கையில் உள்ள இந்திய தொழில்நுட்ப நிறுவனங்கள் மற்றும் பல்கலைக்கழகங்களுடன் நெருங்கிய தொடர்புகளை ஏற்படுத்த கல்வித்துறையில் ஒத்துழைப்பை விரிவுபடுத்துமாறும் அவர் இந்திய அமைச்சரிடம் கோரிக்கை விடுத்தார்.

பொது போக்குவரத்தை மேம்படுத்த இந்திய கடன் முறையின் கீழ் ஆதரவு எதிர்பார்க்கப்படுவதாக போக்குவரத்து அமைச்சர் பந்துல குணவர்தன தெரிவித்தார்.

கொழும்பில் இருந்து அவிசாவளை வரையிலான களனிவெளி புகையிரத பாதையை மேம்படுத்துவதற்கும் மின்சாரத்தில் இயங்கும் பஸ்களை தயாரிப்பதற்கும் பொது-தனியார் பங்காளித்துவத்தின் கீழ் உத்தேச கூட்டுத் திட்டத்தை பரிசீலிக்கத் தயாராக இருப்பதாக இந்திய அமைச்சர் கூறினார்.

அமைச்சர்களான சுசில் பிரேமஜயந்த, பந்துல குணவர்தன, இராஜாங்க அமைச்சர் தாரக பாலசூரிய, பாராளுமன்ற உறுப்பினர் யாதாமினி குணவர்தன, பிரதமரின் செயலாளர் அனுர திஸாநாயக்க, மேலதிக செயலாளர் மஹிந்த குணரத்ன ஆகியோர் இந்நிகழ்வில் கலந்துகொண்டனர்.