பொருளாதாரத்தை பலப்படுத்தாமல் நாணயங்களால் ரூபாயை பலப்படுத்த முடியாது!

பொருளாதாரத்தை பலப்படுத்தாமல் தற்காலிக நாணயங்களால் ரூபாயை பலப்படுத்த முடியாது என சுதந்திர மக்கள் கூட்டமைப்பை பிரதிநிதித்துவப்படுத்தும் பாராளுமன்ற உறுப்பினர் கலாநிதி நாலக கொடஹேவா தெரிவித்தார்.

கடந்த சில நாட்களாக ரூபாயின் பெறுமதி பலமாக காணப்பட்டதாகவும், தற்போது அதன் பெறுமதி மீண்டும் வீழ்ச்சியடைந்து வருவதாகவும் தெரிவித்த உறுப்பினர், சர்வதேச நாணய நிதியத்துடன் செயற்படும் போது ரூபாயின் பெறுமதியை அவ்வளவாக கட்டுப்படுத்த முடியாது எனவும் தெரிவித்தார்.  .

உள்ளூராட்சி சபைத் தேர்தலை நடத்த முடியாத பட்சத்தில் நாடாளுமன்றத் தேர்தலை நடத்துவதற்கு ஜனாதிபதி ஏற்பாடு செய்ய வேண்டும் எனத் தெரிவித்த  நாலக கொடஹேவா, இம்மாதத்தின் பின்னர் நாடாளுமன்றத் தேர்தலை நடத்தும் திறன் ஜனாதிபதிக்கு இருப்பதாகவும் அவர் தெரிவித்தார்.

கொழும்பில் உள்ள சுதந்திர மக்கள் கூட்டமைப்பு அலுவலகத்தில் இன்று (16) நடைபெற்ற ஊடகவியலாளர் சந்திப்பில் கலந்து கொண்டு கருத்து தெரிவிக்கும் போதே பாராளுமன்ற உறுப்பினர் மேற்கண்டவாறு தெரிவித்தார்.

மக்கள் தமது பொது பிரதிநிதிகளை தெரிவு செய்வதற்கான சந்தர்ப்பம் வழங்கப்பட வேண்டும் எனவும், 2025 ஆம் ஆண்டு வரை ஜனாதிபதிக்கு அந்த பதவியில் இருக்க முடியும் என்பதால், தேவைப்பட்டால் புதிய பாராளுமன்றத்தில் இருந்து சர்வகட்சி அரசாங்கத்தை அழைக்க முடியும் எனவும்  கொடஹேவா கூறினார்.

வேலைநிறுத்தங்கள் தொடருமானால் அது நாட்டின் பொருளாதாரத்தை கடுமையாகப் பாதிக்கும் எனத் தெரிவித்த  கொடஹேவா, வருமானத்தை அதிகரிப்பதுடன் மக்களின் பிரச்சினைகளிலும் அரசாங்கம் அக்கறையுடன் செயற்பட வேண்டும் எனவும் தெரிவித்தார்.

இச்செய்திக்கு பிரதான அனுசரணை

வீடியோ இங்கே