நாட்டின் சுகாதார சேவை வீழ்ச்சியடைவதை தடுக்க வேண்டும் எனக் கோரிக்கை!

வைத்தியர்கள் நாட்டை விட்டு வெளியேறுவதால் இலவச சுகாதார சேவை வீழ்ச்சியடைவதைத் தடுக்க தொடர்ச்சியான அரசாங்கக் கொள்கைகளை அமல்படுத்த வேண்டிய அவசிய என அரச வைத்திய அதிகாரிகள் சங்கம் வலியுறுத்தியுள்ளது.

சுகாதார துறையில் தற்போது நிலவும் நெருக்கடிகள் குறித்து அரச வைத்திய அதிகாரிகள் சங்கம் விடுத்துள்ள அறிக்கையில் இந்த விடயம் தெரிவிக்கப்பட்டுள்ளது. 

குறித்த அறிக்கையில் மேலும் தெரிவிக்கப்பட்டுள்ளதாவது, “ மருந்து தட்டுப்பாடு, மருந்து விலை உயர்வு, தரமற்ற மருந்துகள் குற்றச்சாட்டுகள், உபகரணங்கள் செயலிழப்பு மற்றும் மனித வள இழப்பு ஆகிய ஐந்து அம்ச நெருக்கடிகள் காரணமாக இலங்கையின் சுயாதீன சுகாதார அமைப்பு விரைவில் வீழ்ச்சியடையும் அபாயத்தில் உள்ளது.  

இந்த நெருக்கடிகளுக்கு மத்தியில், மருந்துகள் மற்றும் உபகரணங்கள் தொடர்பான பிரச்சினைகளுக்கு குறுகிய கால நடவடிக்கைகள் மூலம் தீர்வுகளை வழங்க முடியும் என்றாலும், மனித வள மேலாண்மை பிரச்சனை நீண்டகால கடுமையான விளைவுகளை ஏற்படுத்தும் என்பதை புரிந்து கொள்ள வேண்டும். 

சிறப்பு மருத்துவர்கள், தர மருத்துவர்கள் உட்பட அனுபவம் வாய்ந்த சுகாதார ஊழியர்களை உருவாக்குவது நீண்ட கால மற்றும் சிக்கலான செயல்முறையாகும். தற்போதைய பொருளாதார நெருக்கடி, வாழ்க்கைச் செலவு அதிகரிப்பு மற்றும் சமூக-அரசியல் ஸ்திரமின்மை காரணமாக நிபுணர்களும் பொது பயிற்சியாளர்களும் விரைவாக நாட்டை விட்டு வெளியேறுகிறார்கள் என்பது இரகசியமல்ல. 

இதன் விளைவாக, நாட்டின் புற மருத்துவமனை அமைப்பில் நோயாளி பராமரிப்பு சேவைகளை பராமரிப்பது கடுமையான சவாலாக மாறியுள்ளது. இந்நிலை தொடருமானால், இந்த நாட்டில் உள்ள புற வைத்தியசாலை அமைப்பு மட்டுமன்றி ஒட்டுமொத்த சுகாதார சேவையும் பாரிய வீழ்ச்சியை சந்திக்கும் நாள் வெகுதொலைவில் இல்லை.

 சட்டவிரோத அச்சுறுத்தல்கள் மற்றும் சட்டத் திணிப்புகளை விட வைத்தியர்களை நாட்டில் தங்கியிருப்பதை ஊக்குவிக்கும் வகையில் அரசாங்கத்தின் தொடர் கொள்கைகளை அமுல்படுத்த வேண்டும்.

இதனடிப்படையில், எட்டு விடயங்களைக் கொண்ட எமது பிரேரணை அண்மையில் வெளியிடப்பட்டதுடன், ஜனாதிபதி உட்பட சகல தரப்பினருக்கும் இந்தப் பிரேரணை சமர்ப்பிக்கப்பட்டுள்ளது. அதிக வாழ்க்கைச் செலவு, அதிக கடன் வட்டி விகிதங்கள் மற்றும் அதிக போக்குவரத்து செலவுகள் காரணமாக பொருளாதார நெருக்கடியை எதிர்நோக்கும் மருத்துவர்களுக்கு சந்தை மதிப்பு மற்றும் செயல்திறன் அடிப்படையில் புதிய சம்பளக் கட்டமைப்பை அறிமுகப்படுத்துவது ஒரு முக்கிய முன்மொழிவாகும். 

மேலும், மருத்துவர்களுக்கான குடியிருப்பு வசதிகள் மற்றும் போக்குவரத்து வசதிகளை அதிகரிப்பது, கடினமான பணியிடங்களில் பணிபுரியும் மருத்துவர்களுக்கு சிறப்பு கவனம் செலுத்துதல், தொழில்முறை மேம்பாடு மற்றும் முதுகலை படிப்பு வாய்ப்புகளை விரிவுபடுத்துதல், நியாயமற்ற வரிக் கொள்கையை மாற்றுதல் மற்றும் மருந்துப் பற்றாக்குறையைத் தீர்ப்பது போன்றவற்றில் கவனம் செலுத்துவது இலங்கையின் இலவச சுகாதார சேவையைப் பாதுகாப்பதற்கு மிகவும் உதவியாக இருக்கும்” எனத் தெரிவிக்கப்பட்டுள்ளது. 

இச்செய்திக்கு பிரதான அனுசரணை

வீடியோ இங்கே