வாட்ஸ்அப்பில் மெட்டாவின் மெகா அப்டேட்: 6 புதிய அசத்தல் வசதிகள் அறிமுகம்!

பயனர்களின் அன்றாட தகவல் பரிமாற்றத்தை மேலும் எளிமையாகவும், நேர்த்தியாகவும் மாற்றும் நோக்கில் வட்ஸ்அப் (WhatsApp) நிறுவனம் பல புதிய அம்சங்களை அறிமுகப்படுத்தியுள்ளது.

தனிப்பட்ட வாழ்க்கை மற்றும் அலுவலகப் பணிகளைத் தனித்தனியாக நிர்வகிப்பதற்கும், உரையாடல்களை மெருகூட்டுவதற்கும் இந்த புதிய கருவிகள் உதவும் என வட்ஸ்அப்பின் தாய் நிறுவனமான மெட்டா (Meta Platforms) தெரிவித்துள்ளது.

இதுவரை அண்ட்ரோய்ட் பயனர்களுக்குக் கிடைத்து வந்த 'ஒரே கைபேசியில் இரண்டு வாட்ஸ்அப் கணக்குகளைப் பயன்படுத்தும் வசதி' இப்போது ஐபோன் (iOS) பயனர்களுக்கும் வழங்கப்பட்டுள்ளது.

இதன் மூலம் வேலை மற்றும் தனிப்பட்ட தேவைகளுக்காக இருவேறு கைபேசிகளை வைத்திருக்க வேண்டிய அவசியம் இனி இருக்காது. புகைப்படங்களை அனுப்பும் முன்னரே அவற்றைச் செம்மைப்படுத்த 'மெட்டா ஏஐ' (Meta AI) வசதி அறிமுகம் செய்யப்பட்டுள்ளது.

இதன் மூலம் புகைப்படத்தின் பின்னணியை மாற்றுவதற்கோ அல்லது தேவையற்ற பகுதிகளை அகற்றுவதற்கோ முடியும். எனினும், இந்த வசதி தற்சமயம் குறிப்பிட்ட பயனர்களுக்கு மட்டுமே வழங்கப்பட்டுள்ளது.

பயனர்கள் ஒரு கைபேசியிலிருந்து மற்றொரு புதிய கைபேசிக்கு மாறும் போது, இனி மிக எளிதாகத் தரவுகளைப் பரிமாறிக் கொள்ள முடியும். குறிப்பாக, ஐபோனிலிருந்து ஆண்ட்ரோய்டுக்கும், ஆண்ட்ரோய்டிலிருந்து ஐபோனுக்கும் எவ்வித சிக்கலுமின்றி உரையாடல் வரலாறுகளை (Chat History) மாற்றும் வசதி மேம்படுத்தப்பட்டுள்ளது.

தனித்தனி உரையாடல்களில் உள்ள அதிக கொள்ளளவு கொண்ட கோப்புகளை (Large Files) மட்டும் கண்டறிந்து அழிக்கும் வசதி அறிமுகமாகியுள்ளது. 

இதன் மூலம் முழு உரையாடலையும் நீக்காமல், தேவையற்ற ஊடகக் கோப்புகளை (Media Files) மட்டும் அழித்து நினைவகத்தைச் சேமிக்க முடியும். பயனர்கள் ஒரு எமோஜியை (Emoji) தட்டச்சு செய்யும் போது, அதற்கு இணையான ஸ்டிக்கர்களை வாட்ஸ்அப் பரிந்துரைக்கும். இதன் மூலம் உரையாடல்களை இன்னும் சுவாரஸ்யமாக மாற்ற முடியும்.

உரையாடல்களின் சூழலைப் புரிந்து கொண்டு, அதற்குப் பொருத்தமான பதில்களைத் தயாரித்து வழங்கும் வகையில் செயற்கை நுண்ணறிவு (AI) எழுத்து உதவி மேம்படுத்தப்பட்டுள்ளது. 

இது பயனர்களின் தனியுரிமையைப் பாதுகாக்கும் வகையில் வடிவமைக்கப்பட்டுள்ளதாக நிறுவனம் உறுதியளித்துள்ளது.

இந்த புதிய வசதிகள் தற்போது படிப்படியாக உலகெங்கும் உள்ள அனைத்து பயனர்களுக்கும் பயன்பாட்டுக்கு வரவுள்ளமை குறிப்பிடத்தக்கது.

செய்திகளை அறிய தொடர்ந்தும் https://www.lanka4.com/ ஊடகத்துடன் இணைந்திருங்கள்