அரச வருவாய் நிறுவனங்களின் நேர்மைத்தன்மையை உறுதிப்படுத்த புதிய மீளாய்வு!
இலங்கையின் அரச வருமானத்தை அதிகரிப்பதற்கும், சர்வதேச நாணய நிதியத்தின் (IMF) நிபந்தனைகளுக்கு அமைய நாட்டின் நிதி நிர்வாகத்தில் வெளிப்படைத்தன்மையைப் பேணவும் 2025-29 ஊழல் எதிர்ப்பு தேசிய செயற்பாட்டுத் திட்டம் தீவிரமாக நடைமுறைப்படுத்தப்பட்டு வருகிறது.
இதன் ஒரு முக்கிய அங்கமாகவே, நாட்டின் பிரதான வருமானம் ஈட்டும் நிறுவனங்களான இலங்கை சுங்கம், உள்நாட்டு இறைவரித் திணைக்களம் மற்றும் மதுவரித் திணைக்களம் ஆகியவற்றில் ‘உள்ளக விவகாரப் பிரிவுகள்’ (Internal Affairs Units) நிறுவப்பட்டுள்ளன.
வருமானம் ஈட்டும் இந்த மூன்று பிரதான திணைக்களங்களிலும் உள்ள அதிகாரிகள் பொதுமக்களிடமிருந்தோ அல்லது வர்த்தகர்களிடமிருந்தோ கையூட்டு (இலஞ்சம்) பெறுவதைத் தடுக்கவும், முறைகேடுகளில் ஈடுபடுவதைக் கண்காணிக்கவும் இந்த 'உள்ளக விவகாரப் பிரிவுகள்' சுயாதீனமாகச் செயற்படவுள்ளன.
வரி ஏய்ப்பு மற்றும் சுங்கத் தீர்வை மோசடிகளைத் தவிர்ப்பதற்காக, மனிதத் தொடர்புகளைக் குறைத்து முழுமையான டிஜிட்டல் முறையிலான (Digitalization) கட்டணச் செலுத்தல்களை விரிவுபடுத்துவது குறித்து இக்கூட்டத்தில் ஆராயப்பட்டது.
இந்த உள்ளக விவகாரப் பிரிவுகளின் பிரதானிகள், தத்தமது திணைக்களங்களில் கண்டறியப்படும் ஊழல் மற்றும் முறைகேடுகள் தொடர்பான மாதாந்த அறிக்கைகளை நேரடியாக ஜனாதிபதி செயலகத்திற்கும், இலஞ்ச ஊழல் ஒழிப்பு ஆணைக்குழுவிற்கும் சமர்ப்பிக்க வேண்டும் என அறிவுறுத்தப்பட்டுள்ளது.
ஜனாதிபதியின் செயலாளர் கலாநிதி நந்திக சனத் குமாநாயக்க தலைமையில் நடைபெற்ற இக்கூட்டத்தில், நாட்டின் தற்போதைய பொருளாதார மீட்சிக்கு இந்த மூன்று நிறுவனங்களின் வருவாய் மிக முக்கியமானது எனச் சுட்டிக்காட்டப்பட்டது.
ஊழல் காரணமாக அரசுக்குச் சேர வேண்டிய பில்லியன் கணக்கான ரூபாய் வருமானம் கசிவதைத் தடுப்பதன் மூலமே, பொதுமக்களுக்கான வரிச் சுமையைக் குறைக்க முடியும் என்பதால், இந்தத் திட்டத்தில் எவ்வித அரசியல் தலையீடுகளுமின்றி கடுமையான சட்ட நடவடிக்கை எடுக்குமாறு சுங்கப் பணிப்பாளர் நாயகம், உள்நாட்டு இறைவரி மற்றும் மதுவரி ஆணையாளர் நாயகம் ஆகியோருக்கு ஜனாதிபதி செயலகம் தரப்பில் உத்தரவிடப்பட்டுள்ளது.
(வீடியோ இங்கே )
இச்செய்திக்கு பிரதான அனுசரணை
வீடியோ இங்கே
