இலங்கை மற்றும் அமெரிக்காவிற்கு இடையிலான நீண்டகால பாதுகாப்பு ஒத்துழைப்பின் ஒரு அங்கமாக, அமெரிக்க பாதுகாப்பு பாதுகாப்பு ஒத்துழைப்பு முகமையின் 'உபரி பாதுகாப்பு பொருட்கள்' திட்டத்தின் கீழ் இந்த 10 'சீ ரேஞ்சர்' (TH-57 Sea Ranger) ஹெலிகாப்டர்களும் எவ்வித கட்டணமுமின்றி (No Cost) முற்றிலும் இலவசமாக இலங்கைக்கு வழங்கப்பட்டுள்ளன. 

கடந்த மார்ச் மாத நடுப்பகுதியில் அமெரிக்காவிலிருந்து கடல் வழியாக அனுப்பப்பட்ட இந்த ஹெலிகாப்டர்கள் தற்போது கொழும்பு துறைமுகத்தை வந்தடைந்துள்ளன. இரத்மலானை விமானப்படைத் தளத்தில் பரிசோதனை: துறைமுகத்தில் இருந்து பாதுகாப்பாக இறக்கப்பட்ட 10 ஹெலிகாப்டர்களும் தற்போது இரத்மலானை விமானப்படைத் தளத்திற்கு (SLAF Base Ratmalana) கொண்டு செல்லப்பட்டுள்ளன. 

அங்கு விமானப்படையின் பிரத்தியேக பொறியியலாளர் குழுவினரால் அவற்றின் பாகங்களை மீண்டும் இணைத்தல் (Configuration), தொழில்நுட்பப் பரிசோதனைகள் மற்றும் சோதனைப் பறப்புகள் (Test Flights) என்பன மேற்கொள்ளப்பட்டு வருகின்றன.

விமானப்படைக்கு பழக்கப்பட்ட அலகுகள்: இந்த TH-57 ஹெலிகாப்டர்கள், உலகப் புகழ்பெற்ற 'பெல் 206 பி-3 ஜெட் ரேஞ்சர்' (Bell 206B-3 Jet Ranger) ஹெலிகாப்டர்களின் இராணுவப் பதிப்பாகும் . இலங்கை விமானப்படை 1969 ஆம் ஆண்டிலிருந்தே 'பெல் 206' ரக ஹெலிகாப்டர்களைப் பயன்படுத்தி வருவதால், இவற்றைப் பராமரிப்பதிலும் இயக்குவதிலும் உள்ளூர் தொழில்நுட்பவியலாளர்களுக்கு ஏற்கனவே போதிய அனுபவம் உள்ளது.

இலங்கை விமானப்படையின் புதிய வான்படை அதிகாரிகளுக்கான ஆரம்ப மற்றும் மேம்பட்ட ஹெலிகாப்டர் ஓட்டுநர் பயிற்சிகளை வழங்குவதற்கு இவை பிரதானமாகப் பயன்படுத்தப்படும்.

கடல் மற்றும் தரை வழிப் பகுதிகளில் அவசர தேடுதல் மற்றும் மீட்புப் பணிகளுக்கு இவை ஈடுபடுத்தப்படும். கடந்த ஆண்டு (2025) நவம்பரில் இலங்கையைத் தாக்கிய 'டிட்வா' (Ditwah) சூறாவளியின் போது, பாதிக்கப்பட்ட மக்களுக்கு வான்வழியாக நிவாரணங்களை வழங்க போதிய ஹெலிகாப்டர்கள் இல்லாத குறைபாடு காணப்பட்டது.

எதிர்காலத்தில் இத்தகைய இயற்கை அனர்த்தங்களின் போது உடனடி மீட்பு மற்றும் மனிதாபிமான உதவிகளை வழங்க இந்த புதிய ஹெலிகாப்டர் தொகுதி பெரும் பலமாக அமையும் என வான்படைத் தலைமையகம் தெரிவித்துள்ளது.

லங்கா4 (Lanka4)

(வீடியோ இங்கே )